"Уйлах нь, гуних нь инээх, эерэг байхтай адилхан зүйл"

2022/11/21

Өнөөдөр гунигтай өдөр байна.

Жин дарж, амьсгал боосон хүнд агаар хэнхэлдэг цээжинд багширч, дотор дарсан энэ мэдрэмжийг дагтаршихаас нь өмнө гаргаад шидчихье гэхнээнэ урт урт амьсгаа ч уудалж гаргаж дийлэхгүй нь. Дэмий л хүнд хүнд санаа алдан сууна. Гадаа бас ялгаа алга, цас дарсан, хүйтэн, тэнгэр цэлмэг хэрнээ аясгүй хуйсганасан өдөр. Гунихын шалтаг, уйлахын шалтгаан ер мундах биш. Заримдаа бүх зүйл энгийн амар жимэр хэрнээ л, надад зүгээр л гунигтай байна. Уйлах нь, гуних нь инээхтэй адилхан, эерэг байхтай ижилхэн тэнцүү зүйл гэдгийг мэддэг хэрнээ, энэ дэлхий дээр би л ганцаараа болохгүй байгаа санагдах нь муухай. Хорвоо эрээн барааны холимог, хар цагааны хуурга байтал бид яагаад аливаа стандартанд заавал тэнцэх гэж, ийм л байхгүй бол чи болохгүй гэдэг өндөр босгонд зүүгдэх гэж чирэгдэж амьдардаг байна аа.

Яг энэ үед Селена Гомезийн “Миний оюун ухаан бас Би” (My Mind & Me) үзэж таарсан нь зол боллоо. Селенагийн сэтгэлийн эрүүл мэндийн талаар хүмүүсд мэдээлэл олгох гэсэн нь, хүний амьдрал хартай бараантай цагаантай байх нь зүв зүгээр шүү гэдэг сэдэл өгөх гэсэн нь, хүмүүс ийн зүгээр гэж ойлгож хүлээн зөвшөөрөх нь цаашлаад тэдний сэтгэл гунигтай, гутралтай өдрүүдэд даваад гарах, зуураад үлдэх, ашиглаад хэрэглэх арга хэрэгсэл болно хэмээн итгэсэн нь сайхан санагдав. Боловсрол бол хүч, тэрхүү хүчийг бүрдүүлэх эд эс нь мэдээлэл. Хүн хэрвээ зөвхөн өөрт байгаа мэдээллээ ашиглан, амьдрал өдөр тутамдаа хэрэглэх аваас заримдаа манантай өдөр ууланд гацах мэт бодолдоо төөрчихдөг. Яг л над шиг ийм гунигтай, би л ганцаараа болохгүй байгаа мэт санагдсан үедээ өөрөө л дотогшоогоо бугшаад байсан бол, өөрөөр хэлбэл зөвхөн өөрийнхөө мэддэг мэдээлэл дээрээ тулгуурлаад байвал манан өтгөрч, би гунигандаа живэх нь тодорхой. Азаар “аан би ганц ингэж мэдэрдэггүй байх нь, бидний гоё сайхны стандарт гэж бодчихсон байсан тэр зүйл хүртэл заримдаа хуурамч, эмзэг, хэврэг байдаг байх нь” гэж эргэцүүлж бодуулав.

Тэгэхээр Селена баримтат киногоо цацсаны хэрэг ач тус мянга, мянган бээрийн цаана Монголд ч хүртэл зорилгодоо хүрэв. Ер Селена энэ баримтат киногоороо өөрийнхөө давж туулж байгаа амьдрал, ойлгож мэдэрсэн бүхнээрээ сэтгэлийн эрүүл мэндийн боловсролыг хүмүүст илүү хүртээмжтэй, ойлгомжтой, өргөн далайцтай болгохыг зорьж явдаг гэдгээ хуваалцсан байна лээ. Бидний монголын залуусд ч бас ийм мэдээлэл, орчин чухал. Аль ч насны залуу хүмүүсийн амийг авч оддог тэргүүлэх шалтгааны эхний эгнээнд харамсалтай амиа хорлох, чанаддаа сэтгэлийн эрүүл мэндийн боловсрол дутуутай нь холбоотой байдаг.

Өнөөдөр цастай, хүйтэн өдөр байна.

Гэхдээ хуйсганасан сэтгэл минь ганцхан би ингээд байгаадаа биш гэдгийг ухчихснаас хойш гадаа хүйтэн байх тийм ч сонин биш болж хувирав. Холимог хуурга шиг энэ амьдрал эцэс төгсгөлгүй үзэсгэлэнтэй санагдана.

Дундаж монгол Долгор

Холбоотой нийтлэлүүд:

Дундаж монгол Долгор: Эхлэл

Дундаж монгол Долгорын зайлшгүй сурах ёстой хэл

Дундаж монгол Долгорын мөрөөдөл

Дундаж монгол Долгор ба Google map

Дундаж монгол Долгор: Эцэг эхийн ачлал

Дундаж монгол Долгор: Далай анх харсан нь

Дундаж монгол Долгор: Хорин тавны агт араа

Дундаж монгол Долгор: Ганцаараа аялах юмсан гээд бодож суугаа найзыгаа ёврох нь

Дундаж монгол Долгор: Шан-Чи үзээд автсан бодол

Дундаж монгол Долгор: Аравдугаар сард өгөх амлалт