Эрхэм уншигч та бүхэндээ зориулж Дундаж монгол Долгор нийтлэлийг цувралаар хүргэж байгаа билээ. Шинэхэн нийтлэлээ хүлээн авна уу!

Хорвоо дэлхий хурдаараа эргэж байтал нэг мэдэхэд арван сар өнгөрчихөж. Нэг үр тээсэн бол төрчихөөр уг нь урт хугацаа шүү, (ямар ч харьцуулалт хийгээд байгаан тэ ккк). Долоо хоногт нэг удаа та нар руу бичээд мэндчлээд байя гэж бодсон нэг мэдэхэд 5 долоо хоног өнгөрчихдөг шүү. Сониноос таг чиг өнгөрүүлсэн энэ таван долоо хоногт эмээгийнхээ хөлийн хуруутай адилхан хуруутай болоодхов. Манай эмээ одоо ная дөхөж яваа ганган эмээ байдаг юм. Бүр багаасаа бид хэд хоорондоо эмээгийнхээ хөлийн хурууны сонин хэлбэртэйг хачирхаж жиг жуг хийнэ. Эмээгийн эрхийн хурууны хумс дээшээгээ овоогоод ургачихдаг, бид хумсаа урдаас нь хайчилж авдаг бол эмээ хумсаа дээрээс нь зүлгэж багасгадаг, одоо ч тэгдэг. Тэгээд эмээг төрөхдөө л тийм хумстай төрсөн гэж санаад хачныг нь гайхаж өвөр зуураа жиг жуг хийнэ. Гэтэл өнөө л би ойлголоо. Тэр хумс төрөхөд нь тэгж ургасан юм биш ахуй амьдралын явцад, долоо хүүхдээр хүн хийх урт он жилүүдийн нэгэнтээд тийм болчихож л дээ. Долгор, энэ миний эмээгийн нэр. 

Энэ зун дундаж монгол Долгор өдөрт 15000 алхалт дундажласан. Бэлчээрт яваа хонь нэг өдөрт арван хоёр мянган алхалт хийдэг гэж байгаа. Тэгэхээр би бол өнгөрсөн зун мал цаашаа холхив. Тэгээд ингэж их холхихоор хөлийн эрхийн хуруунд цус хураад яваандаа хумс нь ховхроод уначихадаг юм байна. Нэгэнтээ цус хурсан хэсэгт хумс овоорч ургаад эмээ шигээ хумстай болох нь ээ. Төрөхөд маань эмээ байсан болохоор эмээгээ эмээ чигээр л төрсөн санадаг байв. Эмээ маань ч гэсэн жоохон охин байж, энэ хэцүү хорвоог халшрим нийгэмтэй нь туулаад өдий хүрэв гэж бодохоор өр өвдөж, хайрлам. Би нэгхэн зуны хүчир ажилд ингэж ядарч байхад эмээ хоёр хөлийнхөө эрхий хурууны хумсыг хоёуланг нь овоолготлоо ямар их зүйлийг туулаа болдоо. 

Манай их сургуулийн өвгөн профессор ингэж асууж байсан юм. Чи эмээгээсээ илүү боловсролтой юу? гэж. Чи эмээгээсээ илүү боловсролтой юу? Профессорын өгсөн хариулт энгийн. Үгүй ээ чи эмээтэйгээ адилхан боловсролтой, та хоёрын хичээллэсэн салбар өөр. Эмээ бүр, хоёр хөлийнхөө хумсыг овоотол мал аж ахуйн салбарт хичээллэжээ. Гаргасан хичээл зүтгэлийн улбаа нь нүдний өмнө тод. Мундаг. Мундаг гэснээс мундаг гэдэг үгний тайлбар биеийн хүчээр муйхарлаж асуудлыг шийддэг хүнийг хэлдэг гэдэг. Дундаж монгол Долгор хорь дахь жилдээ шинжлэх ухаанчаар суралцах, хөдөлмөрлөх салбарт хичээллэж байна. Мундаг байж таарахгүй. Хумс хугарлаа гэдгээ гайхуулж болохгүй гэсэн үг. Шинжлэх ухаанаар суралцахын утга учир нь буруу зүйлийн өмнөөс хатуу зогсох, зөв зүйлийн төлөө зогсолтгүй зүтгэх, юмны арга эв, тунг тааруулахад оршдог шүү гэж багшийнхаа хэлснийг энд дурсая. 

Аравдугаар сар гэдэг бол хичээлийн шинэ жилийн эхэнд асаж байсан тэр хүсэл тэмүүллээ дахин нэг удаа өрдчихөд гэмгүй цаг хугацаа. Тэгээд би өөртөө намар эхэнд өгсөн амлалтаа дахиад нэг сануулъя. Битгий мундаг бай тэрний оронд шинжлэх ухаанч бай, сурч байгаа юмаа сурсан шиг сур, байгаа газраа байсан шиг бай. Хөдөлмөрлө, гэхдээ ухаантай хөдлө, тод мөрлө. 

Харин та аравдугаар сард ямар амлалт өгөв?

Дундаж монгол Долгор.