Амташсан хэрээ 13 дахина (яагаад заавал арав ч биш арван гурав байдаг байна аа гэж бодсон 12 гэдэг бол бидний нэг бүтэн он цаг, тэр он цаг нэгэнтээ эргэсэн ч нэхэж араас нь дальчиганах буюу нэг зүйлийг дуусгаж нөгөө зүйлийг эхлүүлэх ёстой цаг хугацаанд нөгөөх л нэг юмаа давтаад байх тухай явж явж ер нь get over хийж чаддаггүй экс шиг юмдаа) гэдэг шиг ганцаараа аялаад бүр сурах, дасах, амташих аядсан би бээр энийг унших хэнд ч хамаагүй зориулж хэд гурван үг хэлхэе. 

Тийм юмтай болчихоод, за ингэснийхээ дараа, тэдэн төгрөг цуглуулчихаад, эсвэл за тэрнийг боломжтой болохоор, ингэснийхээ дараа гэх мэтчилэн шалтаг гаргаад байвал шалтаг гараад л байна. Аялахад тохиромжтой цаг хугацаа гэж байхгүй, аялах хугацаа л гэж байна. Ер нь зардлын мөнгө байгаад очоод хонох газраа л шийдчихсэн байхад тэгээд аандаа бүх юм болно доо. 

Хүмүүстэй аялах сонирхолтой юу сонирхолтой, хоолны ширээний ард өнгөрөх хөгжилтэй яриа, хоёр хундаганы цаанаас урсах гүн сэдвүүд гоё уу гоё. Гэхдээ ганцаараа суугаад өөрийнхөө ээрсэн бодол дунд төөрөх эсвэл урд хөлхөх хүмүүсээ ширтэж байснаа нэг мэдэхэд харц маань хүмүүсийн урсгалд хөвөөд явчихсныг мэдрэх ч гоё. Хүний төвлөрөлд цагаан чимээ гэдэг дууны долгион тун тустай гэж хаа нэг газраас уншиж байсан байх. Танихгүй хэлээр ярьдаг хүмүүсийн дунд орох яг тэр цагаан чимээгээр үргэлж хүрээлүүлэхтэй адилхан, гоё. 

Ганцаараа явахаас айдаг гэдэг хүмүүс байдаг яг үнэндээ чи өдөр болгон автобусны буудал хүртэл танихгүй хүмүүсийн дунд ганцаараа алхдаг шүү дээ, агаар бол нэг шүү. Гэхдээ бэлтгэл, төлөвлөгөө маш чухал. Тэгээд юмсыг яс тас төлөвлөх ч яаа бас л чанга шдээ, гэсэн ч гоё. 

Олон ингээд яваад байхаар хэн хамгийн тэргүүн эгнээнд байх ёстой вэ гэдгийг сайн ойлгодог. Чи чинь хэн нэгэнд зориулаад дараа нь үлдсэн үлдэгдэл анхаарал, хугас халамж, хагас хайраар хайрлагдах хүн биш шүү дээ. Тэгээд мэдрэмж, цаг хугацаа, дурсамжийг өгч чадах хамаг чухал хүн чинь үргэлж чамтай хамт бий. Тэр хүн бол чи. Чи өөрөө өөрийгөө хол газар, танихгүй мэдрэмж, амталж үзээгүй амт руугаа дагуулж явах гэж байна. Хичнээн хөөрч догдлом гэж санана. 

Аа тийн, бас заавал чинжилийн хэдэн плажаа авч явах хэрэгтэй юу гэж үү. Аахн тийн хэрэгтэй шүү. Тэгээд тэрний доогуур олон удаа өмссөн таавчикаа чирчихээрээ, хол замд хэсэг нь ганган хэсэг нь тухтай шүү дээ хэхэ.

Эцэст нь чи одоо биш ч ойрын хугацаанд, алс хэтдээ ер нь бодчихсон байхад угаасаа аялна. Яг одоо байгаа амьдралыг мэдрээд таашаах нь алс явах аяллаас ч үнэ цэнэтэй.

Гэхдээ чи удахгүй аялна, тэр мэдээж...

Дундаж монгол Долгор.