Марвел анхны ази гол дүрийн баатартай киногоо цацлаа, хятадууд тэр киног нь олигтой хүлээж авсангүй, IMBD-ийн үнэлгээгээр 10-аас 8 (паа нэлээн сайн кино байх нь). Энэ гурван өгүүлбэр бол миний Шан-Чигийн талаар мэдэх бараг бүх юм байв, өчигдрийг хүртэл. Харин өчигдөр найзтайгаа ойр зуурын сонин солилцож байх зуур манай найз саяхан кино үзсэн гэдгээ хэлээд “Арслантай авдар дээрх домгийн амьтдыг ямар гоё дүрсэлж харуулаа вэ” гэдэг өгүүлбэр унагав. Унагасан энэ өгүүлбэр нь ковидтой холбоотой театр гээч юмыг мартсан намайг тэр зүг рүү тэвхэдчих нь тэр.
Хавь ойрын мянган жил кино театр ороогүй юм шиг санагдаад театр ормогц хөөрч гүйгээд анх удаа хөөсөн эрдэнэшиш идэж үзэж байгаа хүн шиг л өчигдөр чинь чухмаа чухам.
Мэдээж кино гайхалтай. Дүрслэл эффэкт, дууны найруулга, ур чадвар чансаагаараа холливүүдэд хэдий нь танигдсан жүжигчид гээд “үүү” ёстой өөлөх юм би лав олж хараагүй. Манай найзын хэлснээр арслантай авдарны арслан дүрээрээ тэнд чинь ханхалзаад манай ази мангас сүртэй гэж, амьд амьтны сүнс сорж хүч ороод паа яаяа янзын янзын.
Кино дууссны дараа нэг бодол намайг дагаж яваад, би тэр бодолд хэсэгтээ автаад эцэст нь ийм нэгэн санаа авав.
Азиудын бусдаас давуу нэг онцлог бид маш их гэр бүлсэг хүмүүс. Супер баатартай кино учраас эго нь багтаж ядсан нэг мангасаас энгийн хүмүүс болоод эх дэлхийг аварч буй тухай ерөнхий шугам нь явдгаараа явав тэнд. Гэхдээ ази учраас тэр аврах ажиллагааг нэг хүн эсвэл нэг баг биш нэг гэр бүл, омог аймгийнхан хийж байна шүү. Гоё мессеж.
Сэтгэлзүйн шинжлэх ухаанаар хүний үүсэл эр үүсэл буюу ааваас, эм үүсэл буюу ээжээс, энэ хоёр хүнтэй чи эхнээсээ бүр үр тогтсон өндгөн эс байхдаа ямар харилцаатай байсан нь яваандаа чамайг өсвөр насаа өнгөрөөж өсөж өндийсний дараа ч ойр орчимд байгаа эр, эм хүмүүстэй хэрхэн харилцаа холбоо тогтоодог, харилцдаг, аашилдаг болохыг чинь тодорхойлдгоо гэдэг. Тэгээд нэг хэсэг дандаа эерэг манлайлалд уриалдаг байсан эргэн тойрны түүхүүд одоо арай амьдралтайгаар шилжилт хийж өөртөө байгаа бүхнээ зөвшөөр, сул тал байна уу, давуу тал байна уу өөрийнхөөрөө л бай гэдэг болсон. Энэ хоёр мессеж Шан-чигээр дамжиж надад нэлээн гүн бодогдож үлдэв. Шан-чиг бага байхаас нь эхлээд ээж нь арга, эв дотор чинь буй, аавыгаа үзэн ядах биш хүлээн зөвшөөрөө гэж сургадаг. Тэгээд эцсийн мөчид Шан-чи ээжийнхээ тэр сургаалийг ойлгож мэдэрч хэрэгжүүлж байж өнөөх олон амьтны сүнс сорсон аварга амьтныг буулгаж авдаг.
Эр үүсэл аав, эм үүсэл ээжийгээ хүлээн зөвшөөрөх ээж, аавын тухай дуу дуулж, баяраар бэлэг өгөх цагаан сараар хадагтай очихоос өөр. Хүлээн зөвшөөрөхийн тулд бид эхлээд өөрсдийнхөө аав ээж ийм байх ёстой гэсэн хүлээлтээсээ холдох хэрэгтэй. Тэгээд байгаатай нь үлдэх, байгаагаар нь хүлээж авах...
Шан-Чи ямартай ч тэгэв шүү, үзэн яддаг байсан өнөөх аавыгаа хүлээн зөвшөөрөөд угаас өөрт нь байсан хүч чадлаа олж нээв, киноны төгсгөлд.
Дундаж монгол Долгор.
