БОУАӨЯ салбарт хэрэгжиж буй олон улсын төсөл, хөтөлбөрийн санхүүжилт, мэдлэг, технологи, туршлагыг Монгол Улсын хөгжлийн бодлого, салбарын тэргүүлэх зорилттой уялдуулж, бодит үр дүнд хүргэхийг зорьж байна.

Тус салбарт одоогоор олон улсын 35 төсөл, хөтөлбөр хэрэгжиж байгааг БОУАӨЯ мэдээллээ. Тухайлбал, Монголд нүүрстөрөгчийн зах зээлийг хөгжүүлэх эрх зүй, институц, техникийн суурийг бүрдүүлж бэлэн байдлыг хангах, холбогдох зохицуулалт, чадавхыг бэхжүүлэх, “Монголын ногоон, хүртээмжтэй хотууд” төслийг хэрэгжүүлж байна. Төсөл нь хотын хөгжлийг байгальд ээлтэй, уур амьсгалын өөрчлөлтөд тэсвэртэй, хүлэмжийн хийн ялгарал багатай болгохын зэрэгцээ хотын үйлчилгээ, төлөвлөлтийг хүртээмжтэй болгох зорилготой юм.

Биологийн олон янз байдлыг хамгаалахад BIOFIN II хөтөлбөрөөр дамжуулан байгаль хамгааллын санхүүжилтийн тогтвортой эх үүсвэрийг бий болгох, санхүүжилтийн дутагдлыг багасгах шийдлийг хэрэгжүүлж, монголын байгаль хамгааллын тогтвортой санхүүжилтийн механизм, тэр дундаа хамгааллын сангийн тогтолцоог хөгжүүлнэ.

Үүний зэрэгцээ газрын доройтол, бэлчээрийн даац, ойн экосистемийн доройтол, биологийн олон янз байдлын хомсдолыг нэг дор авч үзсэн ландшафтын түвшний төслүүд хэрэгжүүлж байна.

Уур амьсгалын өөрчлөлтийн ил тод байдлыг сайжруулах CBIT-II төсөл нь хүлэмжийн хийн ялгарлын тооллого, хэмжих, тайлагнах, баталгаажуулах тогтолцоог боловсронгуй болгож, монголын уур амьсгалын бодлогын хэрэгжилтийг илүү бодит мэдээлэл, тооцоонд тулгуурлах нөхцөл бүрдүүлэхэд чиглэж байгааг 2027-2028 оны тэргүүлэх чиглэл, хэрэгжилтийн үр дүн, цаашид шийдэх асуудлыг нэгтгэн хэлэлцэх уулзалтын үеэр тодотгож байлаа.

БОУАӨ-ийн сайд Ц.Сандаг-Очир хэлэлцүүлгийн үеэр уур амьсгалын өөрчлөлтийн үндэсний зорилтыг хэрэгжүүлэх, ногоон эдийн засаг, нүүрстөрөгчийн зах зээл, ногоон санхүүжилтийг хөгжүүлэх, биологийн олон янз байдлыг хамгаалах, газрын доройтлыг багасгах, усны нөөцийн аюулгүй байдлыг хангах чиглэлд төсөл, хөтөлбөрийн үр нөлөөг төвлөрүүлэх нь чухлыг онцлов. Үр дүн тодорхой, хэмжигдэхүйц байх, төслүүдийн уялдаа, давхардлыг арилгах, асуудлыг хариуцах эзэнтэй шийдэх, төлөвлөлт, мэдээлэл, тайланг нэгдсэн шаардлагаар хэрэгжүүлэх, төслийн үр дүнг тогтвортой, үргэлжлүүлэн ашиглах нөхцөл бүрдүүлэхэд анхаарах ёстойг тэмдэглэлээ. 

Байгаль орчны салбарт олон улсын хамтын ажиллагааг 1992 оноос эхлүүлж, өнгөрсөн хугацаанд эрх зүйн орчныг боловсронгуй болгох, ТХГН-ийн сүлжээг өргөжүүлэх, экологийн чухал бүс нутгийг хамгаалах, нутгийн иргэдэд түшиглэсэн байгалийн нөөцийн менежментийг хөгжүүлэх зэрэгт ахиц гаргажээ.