Дундаж монгол Долгор: Хэдэн төгрөгний цалинтай ажилд орох вэ?

2022/05/09

Намайг бага байхад аавын нэрний ард ХЭАА гэж товчилж бичдэг байв. Утасны жагсаалтаас байнга хардаг өнөөх ойлгодоггүй товчлол маань хувиараа эрхлэх аж ахуй буюу одоогийнхоор старт-ап, энтрэфреньр гэх утгатай байсныг саяхан ухсан. Том болоод 00 цаас дуусах гэж байна уу үгүй юу гэдгийг шалгадаг хариуцлагатай насан дээрээ ирсэн чинь ажилд орох, ажил солих ажлаас гарах, ажилгүй байх эсвэл зүгээр л нэрнийхээ ард тийм ажилтай гэж бичүүлэх гэх зэрэг ажил тойрсон асуудал хайр дурлалаас ч чухал сэдэв болдог юм байна. Хэнтэй үерхэх, ямар хүнтэй суух бол нээрээ гоё ажилд орохын хажууд юу юм бэ ккк. Ажилгүй байх, таарахгүй ажил хийх үед санаа сэтгэлийн савалгаа, гутрал гунигийн давалгаа бол бүр уулаа уул. Тийм том, тийм бэрх...

Бидний дийлэнх ажилд орох, ажил солихдоо хамгийн эхэнд хардаг нэг шалгуур үзүүлэлт бол би хэдийг авах вэ гэдэг тухай. Хэдэн төгрөгний цалин авах юм бол, өөр ямар туршлага олж авах юм бол тэгээд цаашлаад дараа дараачийн он жилүүдэд надад хэрэгтэй чадвар, мэдлэг эсвэл хамт олноос ирэх эерэг дулаан мэдрэмж, урам зориг юу байж болох тухай эхлээд боддог. Ер авах гэдэг ухагдахуун бол бидний амьдралдаа сайн мэддэг зүйлсийн нэг. Хүн хоорондын харилцаан дээр ч бас. Бид жирийн үедээ ч юу авах тухайгаа яг таг мэдэж байдаг бол юу өгч байгаа талаараа, юу өгөх тухайгаа айхтар боддоггүй. Энэ бас ажил дээр ч ажиглагдана.

Ажилд орно гэхээр чи мөнгөн орлоготой болж байгаа юм шиг боловч чамаас зөндөө их зарлага гарна. Эдийн засгийн ухаанаар орлого гэдэг бол олж байгаа мөнгөн тоон дээр нэмэх нь алдагдсан боломжийн өртөг байдаг. Өртөгийн тухай ярих үед шууд ба шууд бус өртөгийг тооцох хэрэг гарна. Ажилд ороход алдагдах боломжийн өртөг өнгөц жишээлбэл чи тэр тухайн цагт хийж болох байсан бүх бууж өгсөн боломжууд чинь. Аа, эсрэгээрээ бас ажил хийхгүй зугаацах байсан бол тэр хугацаанд зугаацаад үрэгдчихэж магадгүй байсан тэр мөнгөний хэмжээ гэсэн үг л дээ. Өмнөх цогцолборт ажлын байр, хамт олноос ирэх эерэг орлогуудыг жагсааж бичсэн бол алдагдах боломжийн өртөгийг бодохдоо яг адилхан шугамаас ирэх бусад сөрөг урсгалыг бодох хэрэгтэй. Хэр их ачаалалтай, хэр их стресстэй ажил бэ, хамт олон нь хэр зэрэг токсик вэ зэрэг...

Мөнгөн дүнгээр цалин нь өндөр атлаа стресс ихтэй ажил бол чи тэр стрессийг тайлах гэж илүү их мөнгө зарлагаднаа л гэсэн үг. Ядаргаатай байгааз. Нэмээд автобус унаандаа зарах мөнгөнөөс гадна тэнд үрэх цаг, тэгээд цаашилбал ажлын газрынхантайгаа хамт олон болно нэрийдлээр ууж идэх, хагас бүтэн сайнд спортын өдөрлөг тэмцээн элдэв шалдав юманд явах шаардлагатай байдаг бол за тэгээд бүр дуус дуус... Амьдралд мэдээж хүссэн бүхнээ авна гэдэг биелэшгүй. Гэхдээ бид юунд бууж өгөх вэ гэдгээ өөрөө шийдэж чадна. Цалин нь гоё сонсогдож байгаа хэрнээ, нэмээд стресстэй гэрээс чинь хол, токсик дарга, хамт олонтой газар ажиллах эсэхээ хоёр дахин тунгаан бодож үзэж байгаарай.

Дундаж монгол Долгор

Холбоотой нийтлэлүүд:

Дундаж монгол Долгор: Эхлэл

Дундаж монгол Долгорын зайлшгүй сурах ёстой хэл