Дундаж монгол Долгор: Чамд би ийм бэлэг өгнө, энэ шинэ жилээр. Бас дараа нь ч гэсэн

2021/12/21

Өчигдөр 21 оны хамгийн сүүлийн бүтэн сартай шөнө байсан мэдсэн үү. Одоо сар нэг талаасаа дугуйрч харанхуйлсаар дараа буцаад бүтэн болох үед бид аль хэдий нь хорин хоёр онтой золгосон байна. Амьдралын өдөр хоногууд яг л сар шиг, нэг дүүрч нэг хагасарч зарим үед битүүрч харанхуйлсаар ингээд л урсаж одно...

Шинэ жил, цагаан сар, төрсөн өдөр гээд тэмдэглэлт өдрүүдийг бид шинэ болохоор нь эсвэл эхлэл болохоор нь тэмдэглэдэг юм биш харин хүний хуучин хорвоод зарим зүйлсийг бид хэт энгийнчилж, хэвийнжилж, уйдчих гээд мартчих гээд байдаг болохоор албаар бие биенийгээ, өөрөө өөрийгөө ёврох, ирж буй он цаг руугаа хүчтэйхэн түлхэх гэж шинэжилддэг билээ л.

Сар 12-г даваад өдөр 31-рүү хурдлах тутам өнгөрсөн оны турш мэдэгдэх, мэдэгдэхгүйгээр тусалсан, дэргэд байсан, намайг хурцалсан, намайг уйлуулсан, учиргүй догдлуулсан, урам заримдаа хугалсан тэр хүмүүсдээ юу өгье дөө гэж санаа чилээж байгаа биздээ. Бидний бие биендээ өгөх зүйл овор ихтэй, эсвэл заавал орчин үеийнх байх албагүй байх, бүр заримдаа боох ч албагүй байх.

Нэг удаагийн шинэ жилээр айлынхаа бэрүүдэд аяга таваг угаагч порлонтой нь бас бус ахуйн зүйлсийг гоё боогоод өгч байсан. Авсан хүн болгон дамжуулахгүй хэрэглэнэ гэдэгтээ итгэлтэй нь аргагүй цааш тавихыг харах даалгавар биелэгдсэн мэт мэдрэмж өгч байж билээ. Цагаан сараар ээжээс ээжийн гар дамждаг, бэлгийн жагсаалтын хэддүгээрд ч юм бэ дээ, хоол амтлагч савны ком явж байдаг тэ. Саалиа бэлдэхээр саваа бэлд гэдэг үг байдаг ч гэлээ Сантаг орлож өгч байгаа бэлэг чинь сав нь биш амтлагчны цуглуулга байвал дараа нь тэр амтлагчаар амталсан хоол идэх бүртээ чамайг гэх сэтгэлээ, эсвэл чамайг гэсэн сэтгэлийг нь амтлаад час хийсэн бэлэг болохдог шүү. Энэ мэт ахуйн өдөр тутмын хэрэглээ ч бас мэдрэмжтэй бэлэг байгаа биз.

Мэдээж бүх цаг үед чин сэтгэлийн илэрхийлэл захиа хүндтэй байраа эзэлсээр байх болно. Гэхдээ манайхан шинэ жилээ нэг гэрт тэмдэглэж байгаа хэрнээ амаараа хэлээгүй сайн сайхан үгээ сошиал хуудсан дээр л бичиж үлдээх гээд байдаг. Энэ чинь хэтэрхий үхмэл мэндчилгээ биш гэж үү. Аавдаа хайртай шүү, ээждээ баярлалаа, гэрийнхэн минь та нар наддаа эрхэм шүү гэдэг энэ чамин үгнүүдийг бичихээс илүү хэлэх нь, хэлж буй мэдрэмжээ мэдрэх нь өөрөө шинэ жилийн хамгийн том бэлэг байх болно. Хурдсаж буй зүрхний цохилтоо мэдрээд, хөлөрсөн гараа атгаад нүд рүү нь харж байгаад баярласнаа, хайрласнаа хэл нь гэдэг ичмээр ч гэлээ догдлом нандин мэдрэмж шүү.

Монголчууд бид их ичэмхий. Гэр бүлүүд ихэнхдээ хаалттай байдаг. Хайртай шүү гэж бичиж чаддаг мөртлөө үйлдэж чаддаггүй гэр бүлүүд зөндөө байгаа. Ийм мэндчилгээг 31-ний орой баярын ширээний ард хүлээж авч байгаа хүн хариуд нь яах ёстой вэ гэвэл яг нүд рүү нь харж байгаад сонсоод, баярлаж буй сэтгэлээ нүдний нулимс, нүүрний мишээлээрээ нуулгүй илэрхийлээд хэлж дуусахаар нь тэврэх хэрэгтэй, ээж нь охиноо, аав нь хүүгээ. Аав эрүүлдээ уйлах, ээж хааяа гэртээ уух аль аль нь ялгаагүй хэвийн гэж хүлээж авдаг болцгооё. Аав, ээж л гэж дууддаг болохоос биш адилхан хүн шүү дээ.

Тэмдэглэлт өдрүүдээр нэг нэгэндээ өгч болох хамгийн эрхэм зүйл бол оршихуйгаараа, бодол сэтгэлээрээ нэг газар хамтдаа байх. Ингэж хамт байгаагаа мэдэрч талархах...

Дундаж монгол Долгор гэрийнхэндээ яг л дээр дурьдсан бэлгүүдийг өгнө. Хүний хуучин хорвоог шинэ болгох гэж заавал гоёж гангалахгүй. Байгаа зүйлүүд маань үнэн бас эрхэм учраас. Ямар нэгэн гялалзаж, гялтганасан зүйлээр боохгүйгээр, дэмий зүгээр л хэдэн үг биччихээд уншсан эсэхийг нь ч мэдэхгүй хаяж орхилгүйгээр оршихуй, бодол сэтгэлээрээ хамт байна. Хамгийн эрхэм хүмүүсдээ талархана, тэднийг гэх сэтгэлээ үргэлж тээж явдаг гэдгээ хэлнэ, тэгээд тэврэнэ. Энэ бол миний шинэ жилийн бэлэг. Дараа нь ч бас өдөр болгон ийм байхыг хичээнэ. Байнга тэвэрч, байнга талархана гэсэн үг биш л дээ. Аавыгаа эрүүлдээ уйлвал, ээжийгээ хааяа нийгмийн хэв жаягаас өөр юм хийвэл зүгээр л хүлээж авна гэсэн үг. Сэтгэлзүйгээрээ эрүүл байхыг хичээнэ, нээлттэй байхад дадна. Энэ бол миний өөртөө өгөх шинэ оны бэлэг. Дандаа бусдыг гээд яваад байж болохгүй шүү дээ. Хоногийн хорин дөрвөн цагийн хорин тавд нь чиний төлөө байгаа өөрийгөө эхэлж бодох нь зүйн хэрэг. Чиний сэтгэлзүй ч бас бүрэн бүтэн байх эрхтэй. Чамд шинэ жилийн мэнд хүргэе!

Дундаж монгол Долгор.

Холбоотой нийтлэлүүд:

Дундаж монгол Долгор: Эхлэл

Дундаж монгол Долгорын зайлшгүй сурах ёстой хэл