Сайн уу, аясаараа алгуурхан урсаж байтал алсарч одов арван сар. Одоо ингээд жаран өдөр хоног өнгөрмөгц бид ковидын он тооллын гутгаар жил рүү жирээх нь ээ. Татар Монгол хоорондын дайн, дэлхийн нэг хоёрдугаар дайн хүйтэн дайн гэж дуулж байснаас дайн дотор амьдрах ямар байх талаар төсөөлөлгүй надад вирусын зэмсэгтэй ийм дайны амьд гэрч болох сонин байгаа. Хорь ч юмуу гучин жилийн дараа за магадгүй хэдхэн жилийн дараа энэ үеийн талаар үр хойч маань түүхийн хичээлийн програмаасаа олж үзээд лавлаж надаас асууна байхдаа гэж бодохоор ч бас сонин байна.

За энэ сониучхарлыг түр хойш тавъя. Уншигч таны арван сар яаж өнгөрөв? Хэрвээ хүсвэл бичээрэй. Нөгөө хэлдгээрээ хүний хуучин хорвоо шүү, харилцааны шинэ хэлбэр гарч ирсэн ч шалгарсан, сийлэгдсэн бичих гэдэг энэ харилцаа хамгийн нандин бат бөх утга учиртай харилцааны хэрэгсэл байхаар болно. 

Берлинд тэр удаа хөл хорионд түгжигдэх 12 цагаас өмнө амжиж нэг жазз бааранд очиж билээ. Өдөр нь утсаа шагайнгаа завгүй холхилдох хүмүүсээр түжигнэж байсан өнөөх гудамж харанхуйд сонингийн цаас нааш цааш хийссэн хааяа нэг машины гэрэл гялбахаас өөр энергийн урсгалгүй амгалан руу уусчихсан байж билээ. Тэр хоосорсон гудамжаар өнгөрөхтэй зэрэгцээд хотоо үзүүлж явсан эгч маань хоёулаа Оройгүй сүм гэх алдарт барилгын хажуугаар өнгөрч байна гэлээ. Тэр мөчид оройгүй сүм гэдэг бол хүний биелүүлж амжаагүй ариун хүслийг хэлдэг яруу дүрслэл юм шүү гэж тайлбарлаж байсан нэгэн хүний үгийг нэхэн санав. Тэгээд нөгөө зорьсон жазз бааранд очвол мөр шүргэн долгилсон саарал үсээ залгуулаад завсрын өнгөтэй нарийн ороолт хүрмэн дээрээ зүүсэн настай нэгэн ах төгөлдөр хуурынхаа ард хүсэл долгилж анирласан нэгэн ая мэтгэж байж билээ. Энэ өвөө залуудаа аянч дэлхий дахинаар аялан тоглосон алдартай хөгжим болохыг хүсдэг байсан болов уу (үгүй ч байх болов уу) гэж өнөөх биелээгүй ариун хүсэл, оройгүй сүм минь гэдэг бодолтойгоо бодит орчноо сүлж үлдээсэн тэр мөч сэтгэлд хадгалагдчихаж. 

Биелээгүй ариун хүсэл. Хорин нэгэн онд зорьсон хүслээс нь биелээгүй үлдсэн хүсэл юу байна. Өнөө сард тэр хүслээ биелүүлэх гээд дахиад нэг хичээгээд үзэх үү бөөнөөрөө. Түр азнаад анзаарахгүй л бол, хэсэг хэсэг байж байгаад өөрийгөө хүчилж л байхгүй бол алгуур амьдралдаа алсарчихдаг хорвоо шүү, тэгээд мянга мянгаараа сэтгэлийн оройгүй сүмтэй хоцорчихдог байж магадгүй. Энэ захиа маань чамд бичсэн урам зоригийн захиа шүү. Би чамайг өөрийнхөө хүсэл мөрөөдлийн төлөө нэг шат, нэг зориг нэмнэ гэдэгт чинь итгэж байна. Арваннэгдүгээр сар, хүчээ хүчлэн шахах сар ажгуу. 

Дундаж монгол Долгор.