Өнөөх ковидын он тооллын гуравдугаар онд суманд өртөвөө, Долгор гуай. Хүн сүрэг хоёр жил өөрсдийгөө юм юмнаас хорьсон болохоор өнөө жил элдэв вирусын дайралтад их эмзэг байна. Тархи уншихаар, булчин хөдлөхөөр хөгждөг гэдэг шиг бидний код тэгж програмчлагдсан бололтой, дархлаа ч мөн ялгаагүй. Хорвоо ертөнцийн хууль нь энэ байх, давтагдах. Өнгөрсөн хоёр жил өвөл болгон ордог өнөөх олон төрлийн вирусын сорилтоосоо ухарсан болохоор дархлаа маань нялхарч энэ жил вирусын ханиаданд их эмзэг тусав.
Ковидын сум дархлааны армийг бол хүчтэй онож байна шүү. Тэрнээс ч хүчтэй сэтлэгдсэн нэг бүс бол сэтгэл санааны арми. Өөртөө зэвсэг хадгалж яваа, үүнийгээ эргэн тойрныхондоо тараачихсан, тараачихна гэхээс ихэд айж, өрөөндөө хэдэн өдөр өөрийгөө түгжив. Ковид тусчихаад л ингэж аашилж байгаа юм биш начир дээрээ гамгүй эмо хүн ажгуу. Гэхдээ өдөр тутмын амьдралаараа, нэг газраас нөгөө газар руу байнга яарч байдаг хэвшлээрээ энэ эмо зангаа дараад далдалчихдаг хэрэг. Хаа нэг ганцаардал намайг хуччихвал “завгүй” гэдэг хөнжлөөр хулдчих ч юмуу “уух” гэдэг завинд суулгах ч юмуу эсвэл нулимсаараа урсгах гэхчлэн хариу арга хэмжээ авчихдаг. Гутрал, ганцаардал гэхдээ ганц надад мэдрэгддэг шаналантай мэдрэмж биш хүн болгон тээж явдаг ачаа байх.
Сэтгэл санаа хямрах гэснээс психоанализын эцэг Зигмунд Фрейд анхнаасаа сэтгэлзүйг далайтай зүйрлэж байсныг санаж байна уу. Далайн төвшнээс дээш ил гарч мэдэгдэх хэсгийг ухамсарт оюун ухаан /эго/ гэдэг бол өнөөх төвшнээс дор нүдэнд үл үзэгдэх гэхдээ хүний амьдралын жижиг сажиг том бүх үйлдэлд хүчтэй нөлөөлж байдаг тэр түнэр харанхуй, эмх замбараагүйг үл ухамсарлахуй /ид/ гэсэн байдаг. Үл ухамсарлахуй, ухамсарт ухаан хоёрыг заагалж буй тэр далайн түвшин бол Фрейдынхоор супер эго. Мэдүүштэй нь энэ супер эго далайн гадарга гучин нас давахаар хөлдчихдөг байх нь. Яг л бидний ишлэх дуртай “Өвөл айсуй” хэллэг шиг. Юу гэсэн үг вэ гэвэл хорин настайдаа өөрийгөө засаж тордох, учраа олохгүй байгаа ааштайгаа үзэлцэх, эр эм үндэс ижий аавтайгаа эвтэй харилцаа тогтоох зэрэгчлэн ёдор араншингаа засахгүй бол оочер дайрдаг, атусанд сандал чөлөөлсөнгүй гэж ялархдаг насанд хүрсэн хүн болж өтлөдөг байх нь ээ.
Долгор гуай хориод насныхаа дунджаас чүд хэлбийж яваа учраас ковидтой ч, сэтгэл санааныхаа гутралтай ч тун давгүй тулалдаад өнгөрөв. Дахиад сануулъя, залуусаа хоёрдогч халдвараар хүндрээгүй л бол вирусын эсрэг ханиаданд антибиотик уухгүй мөн бага зэргийн халууралтыг ч бас яаран эмээр дарахгүй. Халуурах, нус гоожих, ханиах зэрэг шинж тэмдгүүд чиний биеийн дархлааны эсүүд вирусын эсүүдийн эсрэг үзэлцээд аль нэг нь тэр тулаанаас амь үрэгдэж байгаагийн гэрч юм шүү. Ямар ч вирусын ханиадтай дархлаагаа дэмжих замаар тулалддаг, дайтах урлаг юм даа.
Ай хөөрхий өвөл айсуй…
Дундаж монгол Долгор.
Холбоотой нийтлэлүүд:
Дундаж монгол Долгорын зайлшгүй сурах ёстой хэл
Дундаж монгол Долгорын мөрөөдөл
Дундаж монгол Долгор ба Google map
Дундаж монгол Долгор: Эцэг эхийн ачлал
Дундаж монгол Долгор: Далай анх харсан нь
Дундаж монгол Долгор: Хорин тавны агт араа
Дундаж монгол Долгор: Ганцаараа аялах юмсан гээд бодож суугаа найзыгаа ёврох нь
