Дундаж монгол Долгор: Эмэгтэйчүүдийн ариун цэврийн өрөө

2022/04/16

Энэ долоо хоногт дуучин Маралжингоогийн гогдсон сэдвийн дагуу эмэгтэйчүүдийн ариун цэврийн өрөөний талаар ярихаар шийдлээ. Бид нэг сэдвийн талаар сэвж, шаагилдаж бол чадаад байна. Харин гарц, шийдэл, үйлдэл хийх тал дээрээ "тэг" заагаад байх шиг байна. Тиймээс энэ удаа шуудхан ариун цэврийн өрөөг хэрхэн ашиглах талаар заавар бичихээр шийдлээ.

Намайг бага байхад манайх аймгийн төвд хашаанд амьдардаг байв. Улсын сургуульд сурагч болж орсон тэр жил л анх паалантай жорлонтой танилцсандаг. Эгчээсээ ч билүү, ээжээсээ ч билүү "00-д сууж шээж болохгүй халдварт өвчний аюултай, гарч зогсоод хэрэглээрэй" гэдэг зааварчилгаа авсан гэж санадаг. Энд болвоос хоёр мянган оны эхэн үеийн тухай өгүүлнэ. Тэр үед бид нийгмээрээ ядруухан амьдардаг байж. Ариун цэврийн өрөөнд цаас байлгах нь хүний эрхийн асуудал гэдгийг ойлгодог энгийн иргэн бүү хэл сэхээтэн, удирдлага ч байгаагүй гэдэгт итгэлтэй байна. Тэрнээс хойш мэдээж дахиж 00 ингэж хэрэглэх хэрэгтэй гэдэг аман зааварчилгаа аваагүй. Аа харин зурагт хуудаснаас зөв хэрэглэх зааврыг нь сурсан, цаас нь бэлэн байдаг ариун цэврийн өрөөтэй ч болсон. Гэхдээ л энд тэнд бид одоо ч гутлын мөртэй суултууртай таардаг хэвээрээ...

Олон улсад 00 өрөөг хэн тэгэж заваан хэрэглэдэг гээ!? Хятадууд. Бас бид. Гадаанаа хэрэглэж байсан жорлонтойгоо адилхан боддог. Суух биш зогсох хэрэгтэй юм байна гэж хэвшсэн болохоор, ялгадсаа усаар хөөх энэ тэр гэсэн явдал суудалгүй болохоор хэргээ гүйцээчихээд хэнэг ч үгүй гараад явчихдаг. Гэтэл бидний Улаанбаатарт байгаа олон нийтийн ариун цэврийн орчин нөхцөл өөр шүү дээ. Хэрвээ бид ийм энгийн үйлдэл дээр ч хүн надад яаж хандана, би тэгж л харьцана гэсэн өлөн зангаа гаргасаар байвал бидний хүсээд байгаа хүнлэг энэрэнгүй иргэний нийгэм бүрдэхгүй. Бас өөр талаасаа нийгмийн нэг хэсэг нь хичээсээр байхад нөгөө тал нь хөгжихгүй, бахь байдгаараа аашлаад байвал урагшлахгүй. Гэхдээ ядаж өөрчлөлтийг өөрөөсөө.

00-д орохдоо ингээрэй тэгээрэй гэж заах жоохон утгагүй байна, тэр нөхцөл байдал чамаас хамаараагүй шүү дээ, өмнөх хүнтэй чинь ч бас холбоотой. Харин 00-с гарахдаа ингээрэй тэгээрэй гэж зөвлөе. Учир нь тэр үйлдэл чинь өөрчлөлт, хувьслын эхлэл, тэгээд ч чиний үүрэх ёстой хариуцлага учраас... Усаа татах, урсаж уу үгүй юу гэдгийг шалгах, хэрвээ хананд нь юм үлдсэн бол эсвэл суултуур дээр дусчихсан байвал тэрийг арчаад, цэвэрлээд босох. Энгийн бас амархан байгааз. Энэ энгийн үйлдлийг эмэгтэй чи ч бас амьдралдаа хэвшүүлдэг гэж итгэж байна. Аа бас нэг юм, хэрэглэсэн ариун цэврийн цаасаа хогийн саванд хийх, манай улсын хувьд цэвэрлэх байгууламжийн ачааллаас шалтгаалаад 00 цаасыг бохиртой хамт урсгаж болдоггүй, төв цэвэрлэх байгууламж ачааллаа дийлдэггүй юм. Цэвэрхэн 00-д ороод сууж бие засах хэрэгтэй шүү, бас 00-аас гарахдаа цэвэрхэн үлдээх хэрэгтэй. За ингээд биеэ засчихлаа, одоо гэр, тэгээд төр гээд засах янзлах юм их байнаа. Гэхдээ бөөнөөрөө чаднаа, оролцоотой байна аа ялангуяа улс төрд.

Дундаж монгол Долгор

Холбоотой нийтлэлүүд:

Дундаж монгол Долгор: Эхлэл

Дундаж монгол Долгорын зайлшгүй сурах ёстой хэл