Дундаж монгол Долгор: Хуучин он минь баяртай

2021/12/31

Гялтганасан арванхоёрдугаар сар минь гялалзаж хурдалсаар өнөөдөр 31 дэх өдөр дээрээ золгов.

Хаалга сэвх хийтэл нь өргөж цан жавар татуулах мэт шинэ жил ирлээ. Хорин нэгэн онд надтай хамт долоон улсаар аялаж, далайн давалгаанд зэрэг салхилж, манантай тэнгэрт цугтаа нисэж, Монта Барод хамтдаа авирсан уншигч танд баярлалаа. Берлиний орой биелээгүй хүслээ тээгээд оройгүй сүмийн хажуугаар хамт алхснаа, бас Истанбулын дүүрэн сартай тэнгэрийн дор үгэн шувуу нисгэж нийтлэлээрээ учирч байсныг та лав санаж байгаа биз ээ.

Долгорын хувьд энэ жил долоо улсаар аялаж, далай анх харж, Альпийн нурууны үзүүрт авирсан гэдгээс илүү том нэг амжилт байна. Тэр нь өнгөрсөн жил өөртөө зорьсон, “хүний эмзэг цэгийг онож хатгадаг хортой үгэнд харамч байх, харин тухайн мэдрэмж, цаг хугацаатай уягдах үнэн сайхан үгэнд өглөгч байх” гэдэг амлалтандаа хүрчээ. Танихгүй хүмүүстэй зөрж өнгөрвөл сайхан инээгээд мэнд мэдээд өнгөрдөг, үнэхээр хөөрхөн эрэгтэй, эмэгтэй хөгшин залуу хэн ч таарсан гоё байгаа зүйлийг нь магтаад өгдөг өглөгч болсон өөрөөрөө бахархаж байна. Би чадаж байгаа юм чинь өргөн олон монголоороо бүгд чадна. Автобусанд чихэлдэлгүй суудаг, оочер дайрч орклолгүй хүлээдэг, зам дээр зөрсөн хүнтэйгээ дулаан инээд эерэг энерги солиод зөрдөг, учирлаж ярьдаг, уужуу хүлээж авдаг ийм энгийн дундаж үйлдлүүдийг бид бүгдээрээ Улаанбаатар даяар, улс нийтээрээ хийж хэвшдэг болно.

Одоо тэгээд энд би нэгэнтээ илүү үглэж таныг дахиад ёворъё. Бидний үзэх дуртай кино, унших дуртай түүхүүд нэг зүйлийг чухалчлан өгүүлдэг. Тэр нь одоодоо оршоорой, өөрийгөө хайрлаарай, чи бусдаас өөр шүү, тэгээд хүн болгоны энэ өөр байдал нь биднийг авь адилхан болгодог шүү. Бид жил сартай, цаг хугацаатай үргэлж уралддаг, заримдаа яарах нь зөв. Гэхдээ бударч буй цасан дунд инээмсэглэн зогсох шиг сайхан зүйл үгүй шүү.

Энэ оны турш намайг голохгүй тоож уншсан уншигч танд маш их баярлалаа. Хорин хоёр ондоо ч мөн дундаж монгол Долгор нь үргэлжлүүлж бичнэ. Дундаж монгол хүнийхээ эрэлд уйгагүй гарна. Магадгүй олчихвол тэрэндээ хэвших, дахиад олон хүнийг түүндээ уруу татахын тулд дандаа хичээнэ.

Шинэ оны мэнд хүргэе! Дундаж монгол Долгороос нь...

Холбоотой нийтлэлүүд:

Дундаж монгол Долгор: Эхлэл

Дундаж монгол Долгорын зайлшгүй сурах ёстой хэл