УИХ-ын чуулганы баасан гаригийн хуралдаанаар нэр бүхий 13 гишүүний өргөн мэдүүлсэн Төсвийн тогтвортой байдлын тухай хуульд нэмэлт, өөрчлөлт оруулах тухай хуулийн төслийн эцсийн хэлэлцүүлгийг хийв.

Ирэх оны төсөв болон төсвийн тодотгол хэлэлцэж байгаа үед Төсвийн тогтвортой байдлын тухай хуульд өөрчлөлт оруулж байгаа нь оновчтой эсэх, тогтвортой байдлын зөвлөлийн эрх үүргийг тодорхой болгох заалт туссан эсэх асуудлыг гишүүд тодруулж, хариулт авав.

Дараа нь Монгол Улсын 2026 оны төсвийн тухай хуульд өөрчлөлт оруулах тухай хуулийн төсөлтэй хамт өргөн мэдүүлсэн хууль тогтоолын төслийг хэлэлцэж, хуулийг эцэслэн батлах бэлтгэл хангуулахаар Төсвийн болон Эдийн засгийн байнгын хороонд шилжүүлэв. Мөн Иргэний хэрэг шүүхэд хянан шийдвэрлэх тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд болон Гэр бүлийн хөгжлийг дэмжих тухай хуулийн төсөл болон хамт өргөн мэдүүлсэн хуулийн төслийг хэлэлцэхийг дэмжиж, анхны хэлэлцүүлэгт бэлтгүүлэхээр байнгын хороодод шилжүүлэв.

Хэлэлцэх асуудлын дарааллын дагуу Монгол Улсын нэгдсэн төсвийн 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төслийн гурав дахь хэлэлцүүлгийг явуулж, дөрөв дэх хэлэлцүүлэгт бэлтгүүлэхээр Төсвийн байнгын хороонд шилжүүлэв. Хэлэлцүүлгийн үеэр гишүүдээс эдийн засгийг тэлэх, идэвхжүүлэх, эх үүсвэрийг нэмэгдүүлэх бодлогыг тогтвортой барих саналыг хэлж байв. Мөн Монголбанкны мөнгөний хатуу бодлогыг удаан хугацаанд хэрэгжүүлж байгаа нь зээлийн хүү буурахгүй, иргэдийн амьжиргаа дээшлэхгүй байна. Иймээс мөнгөний бодлогыг төсвийн хүрээтэй уялдуулж, богино хугацаанд хэрэгжүүлдэг байх уян хатан бодлого хэрэгжүүлдэг байх асуудлыг гишүүд тодруулж, санал хэлэв.

Үргэлжлүүлэн Монгол Улсын 2026 оны төсвийн тухай хуульд өөрчлөлт оруулах тухай хуулийн төслүүдийн дөрөв дэх хэлэлцүүлгийг явуулав. Хуулийн төслийг баталснаар 435 мянган ахмадуудын суурь тэтгэвэр нэмэгдэж, эрүүл мэнд, боловсрол, соёл, спорт зэрэг салбарын төрийн албан хаагчдын цалин 20-30 хувиар нэмэгдэнэ. Мөн иргэдийн амьжиргааг хамгаалах бодлогын хүрээнд мах, улаанбуудай, хүнсний ногоо, шатахуун зэрэг стратегийн гол нэрийн бүтээгдэхүүний нөөцийг бүрдүүлэх боломж бүрдэх юм.