/Anadolu/ Эрчим хүчний үнийн өсөлт, дэлхий дахины тодорхойгүй байдал, худалдааны түнш орнуудын өсөлт суларсантай холбоотойгоор Европ, Төв Азийн эдийн засгийн өсөлт энэ онд 2.2 хувь болж удаашрах төлөвтэй байна. Энэ тухай Дэлхийн банк мягмар гаригт нийтэлсэн тайландаа дурджээ.
“Хиймэл оюун ухааныг ашиглах нь: Ажил эрхлэлт, аж ахуйн нэгж, бүтээмж” гэдэг нэртэй Европ, Төв Азийн эдийн засгийн төлөв байдлын шинэчилсэн тайланд тусгасан эл таамаг нь 2025 оны 2.6 хувийн өсөлтийн таамгаас доогуур байгаа юм.
Өсөлтийн ийнхүү удаашрах нь бүс нутгийн ихэнх орны эдийн засгийн төлөвт нөлөөлж байгаа хэдий ч хөгжиж буй эдийн засагтай орнуудын тэсвэрлэх чадвар хэвээр байгааг тайланд тэмдэглэжээ. Туркийн эдийн засаг 2026 онд 2.8 хувь, 2027 онд 3.8 хувь, 2028 онд 4.5 хувиар өсөх төлөвтэй байна. Эдийн засгийн хатуу бодлого, импортын эрчим хүчний өртөг нь энэ онд Туркийн өсөлтийг сааруулах төлөвтэй байгаа бол 2027, 2028 оны өсөлт нь бүс нутгийн эдийн засгийн сэргэлтэд чухал хувь нэмэр оруулна гэж тооцоолжээ.
Хиймэл оюун ухаан нь бүтээмжийн өсөлтийн удаашралыг даван туулах, эдийн засгийн өсөлтийг сэргээхэд дэм болох боломжтой хэдий ч ур чадвар, тооцоолох хүчин чадал, ашиглахад бэлэн өгөгдөл дутагдалтай байгааг тайланд мөн дурдсан байна.
Бүс нутагт ажиллаж буй таван хүн тутмын нэг нь хиймэл оюун ухааны нөлөөнд өртөх ажлын байранд ажилладаг ажээ. Харин аж ахуйн нэгжүүдийн аравны нэг хүрэхгүй хувь нь уг технологийг ашиглаж байгаа бөгөөд хэрэглээ нь голчлон энгийн даалгавраар хязгаарлагдаж байна.
