Дундаж монгол Долгор: Хором мөчийн хүч, таны Моментум!

2023/12/24

Мэдэрдэг ая, амьсгалдаг агаар нь өөр өнөөх алс хязгаараасаа та бүхний мэндийг мэдюү. Ийш тийш яарсан, явсан, огт зогсоогүй нэгэн жил өнгөрч энэ өдрүүдэд ингээд жавар тачиганасан жилийн эцэстэй нүүр тулж байна. Завгүй байх тусам амжихгүй байгаа мэт мэдрэмж тачиганасан энэ жавраас ч илүү хайрдаг, тийм ээ?

Оны сүүлчийн энэ өдрүүдэд та өөртөө дүгнэлт хийнгээ, ирэх өдрүүдэд яах ийх тухайгаа төлөвлөх, зарим зүйлээс зай авах, тавьж явуулах гээд олон бодлын үзүүрт дараатай яваа биз ээ. Дараа жилээ төсөөлөн бодох, төлөвлөн бичихэд чинь хэрэг болоосой хэмээн танд энэ бичвэрээ хаяглая.

Урьд жилүүдэд Долгор дандаа л урт холын зорилгоо нэг саначихаад, аандаа алсаараа болох биздээ гэж итгэн айхтар бичиж тэмдэглэдэггүй, төлөвлөж төвлөрдөггүй байж ээ. Тэгэхэээс тэг гэсэн шиг амьдралын янз бүрийн ачаа, элдэв янз хүлээсүүд, энд тэнд үүрсэн хариуцлагууд улам ихсэх тусам өдөр тутамдаа өнөөх яарсан, завгүйгээрээ тууж явтал яг би чинь хэн билээ, юу хүсэж мөрөөддөг, амьдралдаа юунд зорьж байгаа билээ гэдгээ тоолгүй орхичихсон, нэг мэдэхэд он жилийн дундуур тууччихсан байх юм. Ирэх жил энэ алдаагаа давтахгүйн тулд өөртөө Моментумаар бэлэг барих болов. Нэг талаар учран золгох 24 оноо урам зоригтой угтах, нөгөө талаас өөрийн хамгийн эрхэм зүйл болох сэтгэлийн эрүүл мэндээ хадгалах, өөр нэг утгаараа илүү бүтээлч, үр дүнтэй байх гээд төлөвлөгч, тэмдэглэгч Моментумд хүч, давуу талууд олон. Моментум бол хором мөчийн хүч гэх утгатай гэжээ. Эерэг гэгээнээр эрхэм чанараа санан эхлэх энэ дэвтэрт амьдралын зорилгоосоо үүдэлтэй жил, сар, долоо хоногийн төлөвлөгөөгөө гаргах нь байна.

Хүмүүс ер нь тэгдэг, арван жилд хийж, амжуулахаа бүдүүн баргаар төсөөлөөд бүтэн жилд хийх амжуулах зүйлсээ хэт дэврүүн бодоод овоолчихдог, тэгээд өнөөх хүлээлт нь өөрт нь хүлээс болж сэтгэлзүйн дарамт үүсгэдэг гэнэ. Гэтэл үнэндээ бид 10 жилд буюу уртдаа илүү том өөрчлөлтийг бий болгочихсон байдаг. Харин жилийн турш хийх бичил ч хамаагүй займчих эерэг хөдөлгөөн эрчээ аван авсаар тэр урт жилүүд дэх тогтвортой сайн сайханд хүргэдэг, хөтөлдөг байх нь. Тийм ч учраас энэ дэвтрийн томоос жижигт шилжсэн бүтэц нь таныг хүчлэхгүй, гэрийн даалгавар ихтэй санагдуулахгүйгээр харин ч эсрэгээрээ туслагч, тайтгаруулагч дотны найз чинь болох юм байна. Дан ганц төлөвлөж байнга үр дүнтэй байх гэж хичээхээсээ гадна тухайн өдрүүдэд юу болсон, тэр бүхэнд чи юу мэдэрсэн бэ гэдгээ бичиж тэмдэглэн тайтгарахад дэвтрийн уужим зай талбай, долоо хоногийн хуваалтууд нь нэмэр дэм болох нь дамжиггүй. Төлөвлөж бас тэмдэглээд энэ Моментум бүтэн жил таны өөрийн чинь цадиг түүхийг цаасан дээр мөнхлөх нь байна шүү.

Яг энэ сэтгэлээр Моментумаа дэлгээд ирэх жилээ төлөвлөж сууна. Дэвтэртэйгээ учран золгоод ухаарсан хамгийн эхний зүйл уучлах тухай, аливааг алдаатай нь хамт хайрлах тухай байж таарлаа. Та бүгд ч бас Моментумыг, илүү өргөн утгаараа өөрийгөө уучлан хүлээн авч алдаатай нь хамт хайрлаарай. Өөртөө зөөлөн хандаарай. Хангалттай, хангалттайгаасаа ч илүү сайн хичээсэн. Ингээд л болоо. Гомдол тээсэн зүрхээрээ шинэ оноо битгий угтаарай. Моментум эхний арван хуудсан дээрээ л ийм том хичээл заачихаж байгаа юм чинь бүтэн жилжингээ үр өгөөжтэй байна гэдэгт нь огт эргэлзсэнгүй. Хором мөчийн хүч, миний хайрт Моментум!

Дундаж монгол Долгор

Холбоотой нийтлэлүүд:

Дундаж монгол Долгор: Эхлэл

Дундаж монгол Долгорын зайлшгүй сурах ёстой хэл

Дундаж монгол Долгорын мөрөөдөл

Дундаж монгол Долгор ба Google map

Дундаж монгол Долгор: Эцэг эхийн ачлал

Дундаж монгол Долгор: Далай анх харсан нь

Дундаж монгол Долгор: Хорин тавны агт араа

Дундаж монгол Долгор: Ганцаараа аялах юмсан гээд бодож суугаа найзыгаа ёврох нь

Дундаж монгол Долгор: Шан-Чи үзээд автсан бодол

Дундаж монгол Долгор: Аравдугаар сард өгөх амлалт