Есдүгээр сарын 20-нд Баянзүрх дүүргийн нутаг дэвсгэрт есөн настай охин гадны нөлөөтэйгээр амиа алдсан байж болзошгүй хэрэг гарсан. Энэ хэрэгт талийгаач охины хойд эцгийг сэжиглэн саатуулж, шалгаж байгаа юм. Харин сэжиглэгдэж буй этгээд анхны байцаалтаар хэргээ хүлээсэн гэж Хууль зүйн сайд Х.Нямбаатар мэдээлээд буй.
Шүүх шинжилгээний урьдчилсан дүнгээр охины 11 хавирга өмнө нь хугарч бороолсон, гадна талд нүүр, духанд хуучин зулгаралттай, 12 хуруу гэдэс няцарсан шархтай, бүдүүн гэдэсний чацархайд шингэн хуралдсан байжээ. Урьдчилсан байдлаар хэвлийн гялтангийн хордлогоор нас барсан байх магадлалтай гэсэн онош гарсан талаар Шүүх шинжилгээний үндэсний хүрээлэнгийн дарга, хурандаа Г.Дагиймаа мэдэгдсэн.
Олныг цочирдуулам аймшигт энэ хэргээс хойш Лантуун Дохио ТББ-аас санаачлан, олон зуун хүмүүс нэгдэж “Хүчирхийллийг тэвчдэггүй ХҮН БАЙ” нэртэй хүчирхийллийн эсрэг хөдөлгөөн өрнөж байна. Энэ хөдөлгөөнд Америкийн Вашингтон хотоос Лантуун дохио USA салбар нэгдлээ. Тэд тууштай урт хугацаанд үр дүн гартал дэлхий даяар суух Монголчуудаа нэгдэхийг уриаллаа.
