Улсын онцгой комиссын Шуурхай штабаас гадаад улсаас иргэдээ татан авах тусгай үүргийн нислэг хийх талаар мэдээллээ. Манай улс нийт гурван удаагийн нислэгээр 750 гаруй иргэнээ эх оронд нь авчрахад бэлэн болжээ. Бусад улс орнуудын хувьд ч ялгаагүй, гадаад улсаас өөрсдийн иргэдийг татан авах ажлыг зохион байгуулж байгаа аж.

Мэдээллийн дараа Улсын онцгой комиссын орлогч дарга, ОБЕГ-ын дарга Т.Бадрал сэтгүүлчдийн асуултад хариулав.

-Монгол иргэд тухайн байгаа улсдаа шинжилгээнд хамрагдаж, хариу эерэг гарвал тэндээ үлдэх үү, эсвэл онгоцонд тусгаарлан эх оронд нь авчрах уу?

-Ямар нэгэн шинж тэмдэг илэрч, шинжилгээгээр хариу нь эерэг гарсан бол онгоцонд суулгахгүй. Тухайн улс нь олон улсын хамтын ажиллагааны байгууллагын өмнө хүлээсэн үүргийнхээ дагуу иргэнийг эмчилгээнд авч үлдэнэ.

-Тусгай үүргийн нислэгээр Монголоос Япон, Солонгос руу явах хүсэлтэй байгаа иргэдэд ямар шаардлага тавих вэ?

-Солонгос руу явахаар 300 гаруй хүн хүсэлтээ гаргасан. Тэдэнд тавих ганц шаардлага нь энэ өвчин намдаж, олон улсын нислэгүүд хэвийн горимд ортол тэднийг эргүүлж авахгүй. Тэр хүн өөрөө эрсдлээ үүрэх ёстой.

-Гурван удаагийн тусгай нислэгээр хүндэтгэн үзэх шалтгаантай иргэдээ авах уу?

-Маш олон шалтгаантай иргэд бий. Тэднээс ахмад настан, эмчилгээ хийлгэсэн, жирэмсэн зэрэг иргэдээ хамгийн түрүүнд авна.

-Яагаад Герман, Туркээс иргэдээ авахгүй байгаа юм бэ?

-Турк улс 65 орноос онгоц хүлээн авахгүй гэдгээ мэдэгдсэн тул нислэгийг зогсоосон. Берлин хот руу манайх шууд нислэг үйлддэг ч Берлин нислэг хүлээж авахаа зогсоосон. Хэдийгээр Франкфурт руу онгоц явуулж болох ч хүндрэл байна. Тиймээс энэ удаад Турк, Герман руу тусгай үүргийн онгоц илгээх шийдвэр гаргаагүй.

-Тусгаарлах байрны төлбөрт өөрчлөлт орох уу?

-Гадаад улсаас ирж буй хүмүүсийг өөрийнх нь зардлаар тусгаарлах нь олон улсад хэрэгжүүлж байгаа туршлага. Өмнөх таван удаагийн нислэгээр ирсэн иргэдээ хотын төвийн зочид буудлуудад тусгаарласан. Харин ойрын хугацаанд гурван удаагийн нислэгээр ирэх иргэдийг хотоос зайдуу амралт, сувиллын газарт тусгаарлана. Төлбөр нэмэгдэхгүй, 50 мянган төгрөг хэвээрээ.

-Тусгаарлах хугацааг хэд хоногоор сунгах магадлалтай байна вэ?

-Эрсдэл байгаа учраас тусгаарлах хугацааг сунгана. Тухайлбал, Туркээс ирсэн иргэнээс найм хоногийн дараа халдвар илэрсэн. Тэгэхээр эрсдэл хэзээд бий учир тусгаарлах хугацааг хэд хоногоор сунгах эсэхийг өнөөдөр Улсын онцгой комиссоор шийднэ. Мөн иргэн тусгаарлах байрнаас гараад гэртээ өөрийгөө тусгаарлах ёстой. 

ОХУ-ын ерөнхийлөгч В.И.Путин өчигдөр иргэддээ хандаж "Гэрийн хорионд байгаа иргэн танд гэртээ 14 хоног байх эсвэл Эрүүгийн хуулиар таван жил хоригдох гэх хоёр сонголт байна. Алийг нь сонгохоо та өөрөө шийднэ үү" гэсэн хүчтэй мэдэгдэл хийсэн байсан. Манай улс ч мөн хуультай улс. Гэртээ өөрийгөө тусгаарлах иргэдэд ч ийм сонголт байгааг хэлэхээс аргагүй.