Сүүлийн үед олон нийтийн сүлжээний хэрэгслээр "Тог цахилгааны мөнгөө хугацаанд нь төлөөгүй бол чанаргүй зээлдэгчийн ангилалд багтаж Монголбанкны зээлийн мэдээллийн санд бүртгэгдэнэ" гэсэн утгатай мэдээллийг тараах болсон.
Энэ тухай Монголбанкны Зээлийн мэдээллийн албанаас тодруулахад "Улаанбаатар цахилгаан түгээх сүлжээ компани Монгол банктай албан ёсны хамтын ажиллагааны гэрээ байгуулаагүй. Мэдээлэл нийлүүлж, лавлагаа авдаггүй тул зээлийн мэдээллийн санд тог цахилгааны төлбөрийн мэдээлэл нийлүүлэгддэггүй" гэсэн байна.
Одоогийн байдлаар Монголбанкны Зээлийн мэдээллийн сантай 680 орчим аж ахуйн нэгж байгууллага хамтран ажиллах гэрээ байгуулжээ. Банк, банк бус санхүүгийн байгууллага, хадгаламж зээлийн хоршоо, даатгал, утасны оператор компаниуд, Засгийн газрын харьяа яамд Зээлийн мэдээллийн санд мэдээллээ нийлүүлж, хэрэглэж байгаа юм байна.
