Нийслэлийн айл өрхүүдэд сайжруулсан түлш нийлүүлэх ажил энэ сарын 15-наас эхэлнэ. Сүхбаатар дүүрэгт эхний ээлжинд гэр хорооллын 19,693 өрхийн хэрэгцээнд 39,820.53 тонн сайжруулсан түлш шаардагдах тооцоо, судалгаа гарчээ.
Тиймээс тус дүүрэгт Хангамжийн бааз 3, Хангамжийн дундын төв 4, түлш борлуулах цэг 50 байгуулахаар төлөвлөж, 9 болон 11-20 дугаар хорооны айл өрхийн хэрэгцээг хангахуйц хэмжээнд түлш нөөцлөөд байна.
Мөн сайжруулсан түлшийг хадгалах, ашиглах, зуухыг галлах зөвлөмжийг өрхүүдэд өгчээ. Иргэд зуух худалдан авахдаа ахуйн хэрэглээний зуухны MNS 5216:2016 стандарт хангасан тодорхойлолт, тэмдэглэлтэй, хэрэглээний гарын авлагатай зуух худалдан авахыг зөвлөж байна.
ТҮЛШ ХАДГАЛАЛТ:
- Агааржуулалт сайтай, усанд норохгүй, чиг авахгүй нөхцөлд хадгалах
- Хурдан шатах, тэсрэх дэлбэрэх /хий, шингэн/ зүйлтэй ойр байлгаж болохгүй
- Түлшний овоолго, 1,5 метрээс өндөргүй, өргөн нь 5 метрээс илүүгүй байлгах шаардлагатай. Эс бөгөөс түлш өөрөө аяндаа шатах аюултай байна.