Өчигдөр Үндэсний бөхийн холбооны салбар хорооны дарга Г.Билгүүн мэдээлэл хийж, энэ жилийн наадмын шөвгийн 16 бөхөд хийсэн допингийн шинжилгээгээр хоёр бөхөөс допинг илэрсэн гэв. Гэвч бөхчүүдийн нэрийг зарлах боломжгүй гэлээ. Хуулиараа допинг илэрсэн бөхчүүдэд Б сорьцын шинжилгээ хийж, шинжилгээний дүн гарсны дараа нэр усыг нь зарлах ёстой юм байна. Сорьцын шинжилгээг 14 хоногийн дотор бөхчүүд сайн дурын үндсэн дээр хийлгэх ёстой бөгөөд одоогоор хоёр бөхийн хэн нь ч шинжилгээ хийлгэхээр хүсэлт гаргаагүй байна.

Мөн өчигдөр Хэнтийн аймгийн ЗДТГ-аас шинэ аварга Э.Оюунболдын цолны мялаалга наадмыг энэ сарын 18 буюу ирэх ням гаригт хийхээр товлосноо зарлалаа. Мялаалга наадмаар хүчит 128 бөх барилдуулж, гурван насны морь уралдуулан өсвөрийн 300 бөхийн жагсаал хийнэ гэв. Гэвч харамсалтай нь допинг илэрсэн гэх хоёр бөхийн нэг нь шинэ аварга Э.Оюунболд гэх яриа олны дунд тархаад удаж байгаа. Өчигдөр Бөхийн холбооныхон мэдээлэл хийхдээ “бөхчүүдийн нэрийг зарлахгүй. Сорьцын шинжилгээ хийлгэх эсэх нь тухайн бөхийн сайн дурын асуудал” гэсэн нь хардлагыг улам дэврээж байна. Хэрвээ аварга Э.Оюунболд жинхэнээсээ допинг хэрэглэсэн байлаа ч үүнийг тогтоох боломжгүй, тоож хэлэлцэхгүй гэсэн үг.

Ийм тохиолдолд аваргын нэрэмжит наадмыг хийх нь зөв үү? Ядаж допинг илэрсэн гээд байгаа хоёр бөх нь сайн дураараа сорьцын шинжилгээгээ өгөөд нэр ус нь зарлагдсаны дараа аваргын цолны наадмыг хийж болохгүй юу? Ингэвэл бөхөд дуртай бөхдөө хайртай наадамч монголчуудын хувьд сэтгэлийн сэвгүй сайхан наадам болно. Үндэсний бөхөд ийм хэмжээний ёс зүй, бөхийн жудаг байж болно оо доо.  

Б.АМАР