Японы “Nippon Telegraph and Telephone Corporation” буюу NTT компани аянга цахилгааныг удирдах зориулалттай дрон бүтээж, дэлхийд анх удаа амжилттай туршсан талаар “Tomshardware” мэдээллээ. Энэхүү дэвшилтэт систем нь жил бүр байгаль, дэд бүтцэд ихээхэн хохирол учруулдаг аянгын цохилтоос хамгаалах зорилготой бөгөөд цахилгаан орны хэлбэлзлийг өдөөн аянгыг зориуд үүсгэж, түүнийг аюулгүй чиглэлд залж удирдах боломжийг бүрдүүлж байна.

Туршилтыг Шиманэ мужийн Хамада хотод “Fujitsu” компанитай хамтран явуулсан бөгөөд 300 метрийн өндөрт хөөргөсөн дроныг аянга үүсгэх чадвартай болгожээ. Туршилтын явцад газраас удирдлагатай төхөөрөмжийн тусламжтайгаар цахилгаан орныг зохиомлоор хэлбэлзүүлж, аянгын цохилтыг дроныг чиглүүлэн татахад амжилттай болсон байна. Ингэснээр дрон аянга үүсгэсэн анхны тохиолдол болж, байгалийн аюулт үзэгдлийг зохион байгуулалттайгаар хянах боломж бодитой болж байгааг харууллаа.

Энэхүү дрон нь тусгай металл хийцтэй хамгаалалтын тороор тоноглогдсон бөгөөд:

• 150 кА хүртэл хүчдэлийг тэсвэрлэх чадвартай

• Аянгын гүйдлийг өөр чиглэлд урсгах бүтэцтэй

• Цахилгаан цэнэгийг удирдан, цохилтын чиглэлийг өөрчлөх чадвартай

• Аянгад өртсөн ч нислэгийн тогтвортой байдлаа хадгалдаг

• 98 хувийн хамгаалалттай системээр тоноглогдсон

Туршилтын явцад уг дрон аянгын эрчим хүчийг хохирол учруулахгүйгээр удирдах боломжтойг нотолж, дэд бүтцийн аюулгүй байдалд хувь нэмэр оруулж болохыг харуулсан. Ялангуяа салхин сэнс, өндөр барилга зэрэг аянга зайлуулагч суурилуулахад хүндрэлтэй байгууламжуудад энэхүү дэвшил чухал ач холбогдолтой юм. Мөн цаашид NTT компани энэхүү системийг сайжруулж, аянгын цохилтыг урьдчилан таамаглах болон эрчим хүч болгон хуримтлуулах технологи руу шилжих боломжийг судалж буйгаа илэрхийлсэн байна.

Ирээдүйд ижил төрлийн дронуудаар бүрдсэн хамгаалалтын сүлжээ хот суурин, цэнгэлдэх хүрээлэн, холбооны стратегийн байгууламж зэрэгт байгаль цаг уурын аюулаас урьдчилан сэргийлэх гол механизм болж хөгжих төлөвтэй байна.

Эх сурвалж: Tomshardware