Японы Осака хотод ирэх сард нээгдэх Дэлхийн экспогийн хүрээнд анх удаа олон нийтэд үзүүлэх “Ангарагийн чулууг” тус улсын баруун нутгаас экспо зохион байгуулагдах газарт зөөвөрлөн авчирч байна. Уг чулууг 2000 онд Японы судлаачид Антарктидаас олсон бөгөөд олон арван мянган жилийн өмнө Ангараг гарагаас Дэлхий рүү буусан солир болохыг шинжилгээний үр дүнгээр баталжээ.
13 кг жинтэй, регбигийн бөмбөгний хэмжээтэй энэхүү чулуу нь ижил төрлийн олдворуудаас хамгийн томд тооцогдож байгаа юм. Солирыг Токио хот дахь Туйлын судалгааны үндэсний хүрээлэнд хадгалж байсан бөгөөд тэндээс лхагва гарагт Осака руу ачааны машинаар хүргэжээ.
Чулууг ирэх 10 дугаар сард Дэлхийн экспо өндөрлөх хүртэл Японы үндэсний асарт байрлуулж, зочдод дэлгэн үзүүлэх аж. Туйлын судалгааны үндэсний хүрээлэнгийн олон нийттэй харилцах албаны дарга Күмагай Хироясү “1970 оны Осакагийн экспод Сарны чулуу олны анхаарлыг татаж байсан бол энэ удаа Ангараг гарагийн чулууг үзүүлэх нь дахин давтагдашгүй боломж юм” хэмээн онцолжээ.
Эх сурвалж: NHK.
