"Apple" компани "Alibaba"-тай хамтран бүтээсэн хиймэл оюуны функцуудыг "iPhone"-д нэвтрүүлэх хүсэлтээ Хятадын зохицуулах байгууллагуудад гаргасан тухай мэдээлсний дараа “Alibaba Group Holding”-ийн хувьцааны ханш Хонконгийн бирж дээр 8.5 хувиар өсөж, 113.8 хонконг долларт хүрчээ.
Хэдийгээр "Apple" энэ хамтын ажиллагааг албан ёсоор зарлаагүй ч "The Wall Street Journal"-ийн мэдээлснээр, Хятадын зах зээлд хиймэл оюуны үйлчилгээ нэвтрүүлэхийн тулд тус компани "Baidu", "Tencent", "ByteDance" зэрэг томоохон компаниудтай хэлэлцээ хийж байсан ч асуудал үүссэн байна.
"Alibaba" өнгөрсөн сард "Qwen 2.5-Max" чатботоо танилцуулсан бөгөөд энэ нь "OpenAI"-ийн "GPT-4o" болон "DeepSeek V3"-аас илүү үзүүлэлттэй гэж дүгнэжээ. "Apple"-ийн тусламжтайгаар "Alibaba" Хятадын хэрэглэгчдэд зориулсан хиймэл оюуны үйлчилгээг сайжруулах боломжтой гэж шинжээчид үзэж байна.
Нөгөө талаар "Apple" компани Хятадын зах зээлд "Huawei"-гийн шинэ үеийн хиймэл оюуны функцтэй ухаалаг гар утаснуудтай өрсөлдөх шаардлагатай тулгарч байна. 2025 оны санхүүгийн жилийн нэгдүгээр улиралд тус компанийн Хятад дахь борлуулалт 11 хувиар буурч, 18.5 тэрбум ам.доллар болсон нь зах зээлийн хүлээлтээс доогуур үзүүлэлт болжээ.
Эх сурвалж: Bloomberg
