Өвөрхангай аймгийн Баянгол сумын ИТХ-ын дарга болон сумын захиргаанд ажилладаг нэр бүхий зургаан албан тушаалтныг авилгын хэрэгт гэмт буруутгаж, өнгөрөгч сард (2024.09.26) шүүхээс ял оноожээ. Албан тушаалтнууд ажлаа хүлээлгэж өгөхөөр болсон тул Баянгол сум үндсэндээ засаг захиргаагүй болчихоод байна.
Хамгийн ноцтой нь орон нутгийн сонгууль болж байгаа энэ үед тус сумын сонгуулийн хэсгийн хорооны дарга, хэсгийн хорооны нарийн бичгийн дарга нар авилгын хэрэгтэн болсон тул сонгуулийн зохион байгуулалт хариуцах хүнгүй болоод байна.
Мөн тус аймгийн Тарагт сумын Засаг дарга, ИТХ-ын дарга, Тамгын газрын дарга нар авилгын хэрэгт шалгагдаж, шүүхийн шатанд шилжээд байгаагаас сумын ЗДТГ эзгүйрээд байна. Авилгын хэрэгт холбогдсон төлөөлөгч, улс төрийн албан тушаалтнууд бүгд МАН-аас 2020 онд сонгогдсон юм байна.
Өвөрхангай аймагт нүүрлээд байгаа энэ олон авилгын хэргүүдэд зөвхөн сонгогдож, томилогдсон улс төрийн албан тушаалтнуудаас гадна орон нутгийн өмчит компанийн удирдлагууд ч холбогджээ. Тухайлбал, Хангайн бүсийн аймгуудыг эрчим хүчний нүүрсээр хангадаг Баянтээгийн уурхайн үе үеийн удирдлагууд орон нутгийн удирдлагуудтай хамт авилгын хэрэгт шалгагдаж байгаа мэдээлэл байна. Энэ талаар тус аймгийн дарга н.Ихбаяраас тодруулахад,
-"Авилгын хэрэгт холбогдсон МАН-ын нэр дэвшигчдийн асуудал яригдаж байгаа. Гэхдээ АН энэ удаагийн сонгуульд зөвхөн бодлогоор өрсөлдөж, сонгуулийн хар технологи хэрэглэхгүй гэсэн зорилттой ажиллаж байна. Албан тушаалтнуудад ял шийтгэл ногдуулах нь шүүх, хууль хяналтын байгууллагуудын ажил. Харин орон нутгийн сонгуулийг зохион байгуулах хүмүүс ял шийтгэл авсан бол сонгуулийн зохион байгуулалтад хүндрэл үүснэ. Энэ талаар сонгуулийн тойргийн хорооноос тодруулга авч, ял шийтгэлгүй хүмүүсээр сонгуулийн зохион байгуулалтыг хариуцуулах хүсэлт гаргана. Иргэд сонгогчиддоо анхааруулахад, авилгын хэрэгт шалгагдаж байгаа, эсвэл ял шийтгэл авчихсан хүмүүс сонгогдвол орон нутаг төлөөлөлгүй үлдэх, цаашилбал нөхөн сонгууль зохион байгуулах хуулийн шаардлага урган гарч татвар төлөгчдийн мөнгийг үр ашиггүй зарцуулах нөхцөл үүсэх эрсдэлтэй" гэв.
Б.Мандах
