Олны нэрлэдгээр "22-ын товчоо" буюу Сонгинохайрхан дүүргийн 32-р хороонд төв зам дагуу тавьсан боржин чулуун бордюр хагарсан, эмтэрсэн байгаа бичлэгийг иргэд өчигдөр нийгмийн сүлжээнд оруулсан.

Харин хотын дарга Х.Нямбаатар энэ тухай "Зандаахүүгийн Энхболд үүр шөнийн заагаар чулуун бродюрыг цохиж хагалаад зураг авчихаад явсан гэдэг мэдээллийг авсан" хэмээн мэдэгдсэн.

Тэгвэл УИХ-ын дарга асан З.Энхболд өөрийн фейсбүүк хуудсаар дамжуулан хотын даргын уг мэдэгдэлд хариу няцаалт өгсөн байна.

З.Энхболд:

-"Урд шөнө Улаанбаатар хотын Засаг дарга Х.Нямбаатар гэдэг нөхөр намайг гүтгэжээ. Би Өвөрхангай аймгийн Баруунбаян-Улаан суманд мод тарьж долоо хоног болоод Нарийнтээл, Уянга сумаар ороод харих гэж байна. Уянга сумын "Эрх чөлөөний хөшөөн"-ний хажууд байна.

Өвөрхангайд долоо хонож байгаа хүн яаж алх бариад Улаанбаатарын бордюрыг хагалах вэ дээ. Тийм тэнэг мангар бодол Нямбаатарын толгойд л орохоос өөр хүний толгойд орохгүй. 23 мянган төгрөгийн бордюрыг 132 мянгаар авсан асуудалд хариулахын оронд алх бариад хагалсан тухай ярьж буй нь ойлгомжгүй.

УИХ-ын гишүүн байсан, Хотын дарга хүн ингэж доошоо орж, гүтгэлэг хийхээ боль, залруулга гарга. Өвөрхангайд мод тарьж яваа надад Улаанбаатарын сонгууль ямар хамаа байна. Харин ч бордюрын учрыг олъё гэж бодлоо. Чулуу юм бол яагаад алхаар цохихоор хагарчихдаг юм. Чулуу хагардаггүй. Хотын дарга замаа засахын оронд яагаад бордюр солиод байгаа юм. Одоо тэгээд "Энхболд бордюр хагалсан учраас замын ажлыг зогсооё" гэх үү? 

Улсын төсвийн хөрөнгөөр Улаанбаатарыг тохижуулж болно. Гэхдээ бордюраар мөнгө идэж болохгүй. Ийм овилгогүй даргыг ч урьд өмнө үзээгүй. Улаанбаатарчууд дүнг нь тавьчих байлгүй дээ. Нямбаатар аа, надаас уучлал гуйгаарай. Үгүй бол гүтгэсэн хэргээр цагдаад өгнө шүү" гэв.