АНУ-ын дэд Ерөнхийлөгч Камала Харрис “United States Steel” корпорацыг Японы ган үйлдвэрлэгч хамгийн том компанид худалдахын эсрэг байр суурьтай байгаагаа илэрхийлсний зэрэгцээ ажилчин ангийнханд илүү таатай эдийн засгийн нөхцлийг бий болгоно гэдгээ амлажээ.
Ардчилсан намаас ерөнхийлөгчийн сонгуульд нэр дэвшигч К.Харрис Питтсбург хотод Хөдөлмөрчдийн өдрөөр болсон сонгуулийн кампанит ажлын цуглааны үеэр Америкийн компанийг худалдан авах гэж буй “Nippon Steel” корпорацын төлөвлөгөөний талаар хэлэхдээ, АНУ-ын ган үйлдвэрлэгчийг дотоодын эзэмшилд нь хэвээр үлдээж, үйл ажиллагааг нь явуулах ёстой гэж мэдэгдсэн байна.
Цэнхэр захт ажилчдын дэмжлэгийг авна гэж найдаж буй К.Харрис энэ оны долоодугаар сард ерөнхийлөгчийн сонгуулийн өрсөлдөөнийг орхисон Ерөнхийлөгч Жо Байдентай хамт уг арга хэмжээнд оролцжээ. Дэд Ерөнхийлөгч үйлдвэрлэлийн салбарыг цаашид бэхжүүлэхээ амлахын сацуу “US Steel” компанийг “түүхт компани” гэж тодорхойлсон байна.
“Америкийн хүчирхэг гангийн компаниудыг хамгаалах нь манай улсын хувьд амин чухал. Миний бие Америкийн ган үйлдвэрлэгчид болон Америкийн бүх ажилчдын талд үргэлж баттай зогсох болно” гэж тэрбээр хэлжээ. 1901 онд үүсэн байгуулагдсан “US Steel”-ийн төв байр нь ерөнхийлөгчийн сонгуулийн дүнд хамгийн ихээр нөлөөлөх магадлалтай муж улсуудын нэг болох Пенсильвани дахь аж үйлдвэрийн хотод байрладаг.
Япон, Америкийн ган үйлдвэрлэгчид 14.1 тэрбум ам.долларын үнийн дүн бүхий худалдах, худалдан авах гэрээний талаар өнгөрсөн 12 дугаар сард олон нийтэд зарласан юм. Дэлхийн хэмжээнд өрсөлдөх чадварыг нэмэгдүүлж, үйлдвэрлэлийнхээ хэмжээгээр дэлхийд гурав дахь том ган үйлдвэрлэгчийг бий болгох уг саналыг “US Steel” болон түүний хувьцаа эзэмшигчид дэмжсэн байна.
Харин “United Steelworkers union” үйлдвэрчний эвлэл уг хэлэлцээрийг эсэргүүцсэнээр улс төрийн нарийн төвөгтэй асуудал үүсжээ. Худалдан авалт хийхийг АНУ-ын холбогдох байгууллага одоогоор зөвшөөрөөгүй байна. Хэдийгээр “US Steel” нь нэр хүндтэй компани боловч Дэлхийн гангийн холбооны мэдээллээр өнгөрсөн онд дэлхийн хэмжээнд 24 дүгээрт бичигдсэн байна.
