Ардчиллын төлөөх улс төрийн намууд нэгдэж “Ардчилсан нам” үүсгэн байгуулагдсан ойн баярыг угтаж “Democracy Summit” бодлогын реформын хэлэлцүүлэг “Бултаараа баяжигтун” уриан дор зохион байгуулагдаж дууслаа. 

Хууль зүйн сайд асан Х.Тэмүүжингийн "Хуулийн реформ-Төрийн зохицуулалтаас өөрийн зохицуулалт руу сэдэвт илтгэлийг товчлон хүргэж байна. 

Тэрээр "Өнөөдөр би одоо болж байгаа үйл явдлын араас үсэрч ярихаас илүү, бид хаанаас эхэлсэн, өрөөл бусдад хэрхэн хүргэх талаар ярих гэсэн юм. 

Яг 33 жилийн өмнө энд сууж байгаа олон хүмүүс, олон олон аав ээж, ах эгч нар ардчиллыг эхлүүлсэн. Одоогийн ярьж байгаа авлига, хүнд суртлыг устгая, хэвлэлийн эрх чөлөө, хүний эрх, шинэ цаг ирлээ гэсэн уриа лоозонгууд тэртээ 33 жилийн өмнө ч гэсэн яригдаж байсан бид 33 жилийн дараа ч ярьж байна.

Бид 1990-ээд оны үед тэр зорилго, мөрөөдөл, идеалаа олсон. Зөв байсан. Дэлхийтэй адил тэдний хүрч, зорьж байгаатай адил байж болохгүй гэж гээд зорьсон, зүтгэсэн. 

Бид парламентат засаглал, үндсэн хуулийн шүүхтэй болсон, сонгуулийн хороотой болсон, хөрөнгийн биржтэй болсон. Гэвч байгууллагуудын цуглуулга болж, өөр хоорондоо зөрчилддөг болсон. Шинээр үйлдвэрлэсээр байгаад одоо авлигын шүүхтэй ч болно гэж байна. Бидний зорилгод, бидний мөрөөдөлд, бидний эрх чөлөөнд хэр зэрэг хэрэгтэй эсэхийг анзаарахгүйгээр төрийн бүтцийг томруулж эхэлсэн. Хэн нэгэн дарга болж л байвал гээд байгуулга бүрийг үйлдвэрлэж эхэлсэн. Төр данхайсан. Сүүлдээ тэр төр юу бүтээв. 

Ардчиллын, хүний эрхийн тэр соёлуудыг үйлдвэрлэж чадав уу, иргэнээ эрүүдэн шүүдэг, бие биенээ хүчирхийлдэг тогтолцоотой болсон байна. Энэ бидний мөрөөдөл, зорилго байсан уу? 

Ардчилал гажуудсан. 33 жилийн өмнө эхлүүлсэн тэр ардчилал маань яагаад гажуудчихав. Гадны судлаачид ч хэлж байна. Бид дотроо ч ярьж байна. Би сүүлийн 15 жил энэ асуултыг өөрөөсөө асууж байна. 

Иргэнээ эрүүдэн шүүх сандалыг татварынх мөнгөөр худалдаж авдаг нийгэм бидний зорилго байсан уу?!

Монгол улс өнөөдөр цэрэгжсэн орон болж байна. Ардчилсан парламент бүхий засагласан улсад парламентийн спикер гэдэг хүн иргэний байр суурь дээр зогсож, иргэдээ төлөөлдөг байх ёстой. Тийм л хүн. Гэтэл ёслоод зогсож байна.

Нийгэм нь тэр чигээрээ дүрэмт хувцсанд өвчилж, өөрт биед эвтэйхэн хувцастай хүн явж байвал ядуу буурай, харин ёслоод дүрэмт хувцастай явж байвал жинхэнэ удирдагч байна гэж харах болсон" гэлээ.