Өнөөдөр УИХ-ын Хаврын чуулган нээлтээ хийнэ.

Хаврын чуулганы хэлэлцэх асуудлын дараалалд Ерөнхийлөгч У.Хүрэлсүхийн бүхэлд нь хориг тавьсан Олон нийтийн сүлжээнд хүний эрхийг хамгаалах тухай хууль багтаагүй байгаа хэдий ч, дундуур нь оруулж хэлэлцэх нь тодорхой юм. 

ЦХХЯ-ны сайд, УИХ-ын гишүүн Н.Учралын санаачилсан Олон нийтийн сүлжээнд хүний эрхийг хамгаалах тухай хуульд Ерөнхийлөгч У.Хүрэлсүх 2023 оны нэгдүгээр сарын 30-ны өдөр бүхэлд нь хориг тавьсан билээ. 

Тус хуулийн төслийг намрын чуулганы сүүлийн хоёр өдөр машиндан баталсан нь нийгмийн сүлжээнд хүний үг хэлэх эрхийг боогдуулж байна хэмээн иргэдийн зүгээс хүчтэй эсэргүүцэлтэй тулгарч, Ерөнхийлөгч хуулийн төсөлд бүхэлд нь хориг тавьсан юм. 

Ерөнхийлөгчийн хоригын талаар тухайн өдөр ЦХХХ-ны сайд Н.Учрал "Энэ хуулийг батлах цаг нь арай болоогүй гэдгийг ойлголоо. Ерөнхийлөгчийн хоригыг хүндэтгэн хүлээн авч байна. Гэхдээ үзэл санаа, үнэт санаанаасаа ер ухраагүй. Цахим залилан гэхэд 99,8 хувиар өссөн гэсэн тоо үзүүлэлт байна. 18 тэрбум төгрөгийн хохирол нэг жилийн дотор учирсан. Иргэдийнхээ эрх ашгийг хамгаалах гэсэн, хохирогчдийг хамгаалах гэсэн эхний алхам энэ хууль байсан. 2023 оны нэгдүгээр сарын 20-ны өдөр УИХ-аас "Олон нийтийн сүлжээнд хүний эрхийг хамгаалах" тухай хуулийг баталж, УИХ-ын дарга 2023 оны нэгдүгээр сарын 25-ны өдөр ёсчилж, нэгдүгээр сарын 26-ны өдөр ЕТГ-т хүргүүлж тав хоногийн хугацаанд шийдвэрлэх ёстой учраас хоёрдугаар сарын 01-нээс хэрэгжиж эхлэх байсан. Дахиж энэ хуулийн төслийг өргөн барих асуудал өнөөдөр ярихад эрт байна. Цаг хугацаа хэрэгтэй юм байна" гэж байсан юм.

Дашрамд, Ерөнхийлөгч тус хуульд хориг тавьсан ч УИХ хүлээж авахгүй байх боломжтой. Парламентийн түүхэнд ийм тохиолдол цөөнгүй удаа гарч байсан билээ.