2 сарын 4-ний өдөр, Хятадын иргэний нисгэгчгүй онгоц өөрийгөө удирдах чадвар хязгаарлагдмал байсан тул баруун зүгийн хүчтэй салхины улмаас АНУ-ын агаарын хилд нэвтэрсэн. Иргэний шинжлэх ухааны судалгааны бөмбөлөг, нисгэгчгүй онгоц зэрэг нисэх онгоцнууд дэлхий дахинд ховор зүйл биш. Гэтэл АНУ яагаад энэ асуудалд ийм хүчтэй хариу үйлдэл үзүүлсэн бэ? Цэргийн хүчээр устгахаас эхлээд АНУ холбогдох тогтоол хүртэл баталлаа. АНУ-ын энэ үйлдлийн цаана ямар төлөвлөгөө байна вэ?

Нэг. АНУ Хятадын талын нисгэгчгүй онгоцыг устгасан явдал  цэргийн хүч хэтрүүлэн ашигласан гэх хардлага төрүүлж байна

Хятадын Гадаад харилцааны яамны мэдэгдэлд хэлснээр, Хятадын иргэний агаарын тээврийн онгоц АНУ-ын агаарын хилд нэвтэрсэн нь давагдашгүй хүчин зүйлээс болсон санаандгүй гэнэтийн хэрэг юм. Хятадын тал АНУ-д нөхцөл байдлыг олон удаа тайлбарлаж, АНУ-ыг тайван, мэргэжлийн, хүлээцтэй аргаар зүй зохистой шийдвэрлэхийг хүссэн. Энэ агаарын бөмбөлөг хүмүүст цэргийн болон бие махбодын аюул учруулахгүй гэж АНУ-ын Батлан хамгаалах яамны Хэвлэлийн төлөөлөгч хэлсэн. Ийм нөхцөлд, АНУ цэргийн хүч хэрэглэж, Ерөнхийлөгч Байден өөрийн биеэр зарлиг гаргаж, сөнөөгч онгоц, пуужин ашиглан иргэний нисдэг биетийг устгасан нь цэргийн хүчийг хэтрүүлэн ашигласан, хэт болгоомжилсон хариу үйлдэл үзүүлсэн, олон улсын жишиг, олон улсын холбогдох гэрээг зөрчсөн явдал болж байна. Үнэн хэрэгтээ, АНУ-ын агаарын бөмбөлөг өөр улсын агаарын хилийг давах нь хэвийн үзэгдэл. Зөвхөн өнгөрсөн оноос хойш гэхэд АНУ-ын агаарын бөмбөлөг Хятадын зөвшөөрөлгүйгээр арав гаруй удаа Хятадын агаарын хилийг даван ниссэн.

Хоёр. АНУ агаарын бөмбөлгийн хэргийг дэвэргэж байгаа нь их гүрнүүдийн өрсөлдөөнөөс эхтэй ба Хятадыг хязгаарлах зорилготой

Агаарын бөмбөлгийн хэрэг нь үнэн чанартаа их гүрнүүдийн өрсөлдөөний хэрэглэгдэхүүн болж байна. Уг хэрэг гарсны дараа АНУ зүгээр нэг зогсохыг хүссэнгүй, нисдэг биетийг Хятад руу чиглэсэн стратегийн хөзөр болгон ашиглахын тулд энэ хэргийг сүр дуулиан болгож, “тагнуулын зорилготой нисдэг бөмбөлөг” хэмээн дэвшүүлж, хэрэг явдлыг улам бүр дэвэргэж байна. Ингэснээр АНУ-ын Охайо мужид галт тэрэг замаасаа гарч, винил хлорид хэмээх аюултай химийн бодис асгарсан явдлыг олон нийт анхаарах сөхөө гарахгүй.

Мэргэжилтнүүдийн үзэж буйгаар, АНУ нисдэг бөмбөлгийн хэргийг ашиглан нийтийн анхаарлыг өөр тийш нь татах зорилготой. Австралийн “Лови” Гадаад бодлогын судалгааны хүрээлэнгийн Зүүн Азийн ахлах мэргэжилтэн Ричард МакГрегор (Richard McGregor) хэлэхдээ, хэрэг явдлыг илтээр хурцатгах гэсэн ямар ч үйлдэл АНУ-аас гарсан байх боломжтой. Учир нь тэдэнд ингэх бүрэн шалтгаан бий. Жишээ нь, хоёр намын улс төрийн дарамт, Хятад улсын өсөлт хөгжлөөс үүдэх түгшүүр гэх мэт. "Энэ нь АНУ-ын арга барилыг урьдчилан таамаглахад Хятадынхаас илүү хүндрэлтэй болгож байна.” Үүнээс гадна, үнэн хэрэгтээ АНУ нэг талын дээрэнгүй үзлээ цайруулахын тулд үндэслэлгүй түүх зохиохдоо гарамгай гэдгийг Ирак, Сири, Афганистан зэрэг улсуудын жишээ харуулдаг.

Агаарын нисдэг бөмбөлөг зэрэг аргуудыг ашиглан шинжлэх ухааны судалгаа хийх нь дэлхийн улс орнуудын байгаль орчныг судлах нийтлэг арга юм. Гэтэл яагаад энэ удаагийн санамсаргүй явдал Хятад, АНУ-ын харилцаанд шуугиан дэгдээв? Хамгийн боломжит хариулт бол АНУ-ын Хятадын тухай буруу ойлголт, стратегийн алдаатай дүгнэлтээс үүдэлтэй. АНУ Хятадыг геополитикийн хамгийн ээдрээтэй сорилт хийгээд стратегийн өрсөлдөгч гэж үздэг. Хятадын тухай ийм үзлээсээ үүдэн АНУ Хятадыг хааж, боох бүхий л аргыг ашиглаж байна.

Эх сурвалж: БНХАУ-ын ЭСЯ