Л.Оюун-Эрдэнийн Засгийн газрын “шүгэл үлээсэн” (эрх баригч нам дотроосоо зарласан анхны тохиолдол) нүүрсний хулгайтай хийх тэмцэл эхнээсээ үр дүнгээ өгч эхэллээ. Тухайлбал, “ЭТТ” ХК болон “Тавантолгой” хувьцаат компанийн хооронд үүссэн “мөргөцгийн” маргаан эцэслэж, өр төлбөрөө дуусгажээ.

Хоёр компанийн ашиглалтын талбайн хилийн зурвасаас олборлосон нүүрсний төлбөрийг “Тавантолгой” ХК өчигдөр буюу 2022 оны арванхоёрдугаар сарын 27-ны өдөр “Эрдэнэс Тавантолгой” ХК-д бүрэн төлж дууссан байна.

Хоёр дахь илүү том үр дүн нь нүүрсний экспорт өмнөх оныхоос 90 хувиар өсч, 30 сая тонн давсан сайн мэдээ байна. Өнгөрөгч сард УИХ 2023 оны улсын нэгдсэн төсвийг батлахдаа ирэх онд 36.5 сая тонн нүүрс экспортод гаргахаар төлөвлөснийг шинжээчид “хэт эергээр төсөөлсөн, биелэгдэх боломжгүй төсөв” хэмээн шүүмжилж байсан боловч энэ янзаараа ирэх онд ч гэсэн нүүрсний экспорт нэмэгдэх төлөв харагдаж байна.

Шууд утгаараа энэ нь “Эрдэнэс Тавантолгой” ХК-д төрийн БЭТ томилж, экспортод хяналт тавьж эхэлсэнтэй холбоотой боловч, нөгөө талаас экспортын нүүрсний үнийг уурхайн амнаас бус хилийн үнээр борлуулах, Хятадын зах зээл дээр борлуулж биржийн үнэд ойртуулах Засгийн газрын шийдвэр ирэх онд нүүрсний экспортоос орж ирэх төсвийн орлогыг дахин нэмэгдүүлэхээр байна.

Харин нүүрсний хулгайчдыг олж илрүүлэх, хуулийн дагуу хариуцлага тооцож, тохирсон ял шийтгэлийг ногдуулах нь одоо хууль, шүүхийнхний хийх ажил болж үлдлээ.