ЦЕГ-аас Сүхбаатарын талбайд үргэлжилж байгаа жагсаалын үеэр бэртсэн цагдаагийн алба хаагч, иргэд болон холбогдох шалгалтын ажиллагааны талаар мэдээлэл өглөө.
Жагсаалд оролцогчид Төрийн ордон руу дайрах үед арван иргэн бэртжээ. Тэдгээр иргэнд эмнэлгийн яаралтай тусламжийг цагдаагийн байгууллагаас цаг алдалгүй хүргэсэн байна. Мөн иргэдийн эсэргүүцлийн үед цагдаа, дотоодын цэргийн байгууллагын 13 алба хаагч биедээ гэмтэл авчээ. Үүнээс 12 алба хаагч эмнэлгийн тусламж үйлчилгээ авсан бол хамрын яс нь хугарсан нэг алба хаагч эмнэлэгт хэвтэн эмчлүүлж байна.
Цагдаагийн байгууллагаас жагсаал, цуглааны үед үйлдэгдсэн гэмт хэрэг, зөрчлийн шинжтэй 19 үйлдэлд холбогдох шалгалтын ажиллагаа явуулж байгаа аж. Тухайлбал, Засгийн Газрын ордны хаалганы шил хагалсан, хашаа нураасан, гацуур мод галдан шатаасан, тээврийн хэрэгсэл дээр хашаа нурж автомашинд эвдрэл үүссэн байна.
Мөн Туушин зочид буудлын орчимд ачигч тээврийн хэрэгсэлд халдан салхины шил, гэрэл, хаалга зэргийг эвджээ.
Талбайн урд байрлах цагдаагийн постны байрны цонхыг хагалсан зэрэг гэмт хэрэг, зөрчлийн шинжтэй үйлдэлд шалган шийдвэрлэх ажиллагаа явуулж байна.
