"Монгол туургатан төв холбоо", "Урбан иргэдийн форум", "NoDoubleStandard" иргэний хөдөлгөөнөөс "Монгол туургатанд туслах үндэсний хөдөлгөөн" өрнүүлэх болсноо мэдээллээ. 

Тэдний зүгээс Монгол улсын Засгийн газар хилээр орж ирж буй иргэдийн асуудлаар урьдчилан төлөвлөгөө гаргаж ажиллах хэрэгтэй хэмээн үзэж буйгаа онцлов. 

"No double standard" хөдөлгөөний зохицуулагч Э.Одбаяр "Монгол улсыг зориод ирсэн монгол туургатан иргэдэд туслах хэрэгтэй. Хойд хилийн хөдөлгөөн мэдэгдэхүйц ихэссэн байна. Хэрвээ нөхцөл байдал энэ хэвээрээ үргэлжилбэл тооцоолоогүй үйл явдал, хүний урсгал нэмэгдэх магадлалтай. Энэ иргэдийн асуудлыг Засгийн газраас төлөвлөгөө гарган, урьдчилан бэлтгэл хангаж, урьдчилан бэлтгэл хангаж ажиллах шаардлагатай.

Дайны дайчилгаанаас дайжин ирсэн иргэдийг албадан гаргахгүй байх, үүнтэй холбоотой ОХУ-ын аливаа хэлбэрийн үйл ажиллагаанд татагдан оролцохгүй байх зөвлөмж шаардлагыг хүргүүлж байна. Дэлхийн бусад улс энэ нөхцөл байдлыг хүмүүнлэг энэрэнгүй байдлаар шийдэж байгаа.

Хилээр нэвтэрч орж ирсэн иргэдэд хүмүүнлэгийн тусламж үзүүлж болзошгүйтэй холбоотой бэлтгэл ажлыг хангах шаардлагатай байна. Хэрэв шаардлагатай бол эдгээр үйл ажиллагааг зохион байгуулахад иргэний нийгмийн байгууллагууд сайн дурын үндсэн дээр хамтарч ажиллахад бэлэн" гэлээ. 

Мөн тэрээр "ОХУ-ын Гадаад хэргийн болон Батлан хамгаалах яамнаас суугаа улсынхаа Элчин сайдын яам руу хандаж, цэргийн насны иргэдийг албадан буцаах үйл ажиллагааг зохион байгуулах, санхүүжилтийг нь шийдвэрлэж буй тушаал ил болсон. Манай улсын дотоод хэрэгт оролцдог ОХУ-ын Элчин сайд И.К.Азизов уг үйл ажиллагааг гардан зохион байгуулах юм байна. Энэ асуудал дээр манай улс өөрсдийн бие даасан байр сууриа хадгална гэж найдаж байна" гэлээ.