АН-ын дэргэдэх залуучуудын байгууллага болох Ардчилсан залуучуудын холбооноос өчигдөр нэгэн сонирхолтой мэдээллийг хийв. Тус холбооны ерөнхийлөгч С.Эрдэнэболд энэ удаа АН-ын дарга С.Эрдэнийг АТГ-аас Эрүүгийн хуулийн 22.1 буюу “Эрх мэдэл, албан тушаалын байдал, эрх нөлөөгөө урвуулан ашиглах” гэмт хэрэгт буруутгаж, АТГ-аас мөрдөн шалгах ажиллагаа явуулж байгаа нь үнэн болохыг мэдээллээ. Харин Ерөнхийлөгч асан Х.Баттулгын хувьд түүний эсрэг ямар нэг хэргээр мөрдөн шалгах ажиллагаа явуулаагүй болохыг АТГ болон прокурорын байгууллагаас тодруулжээ.

Ингэхдээ “АН-ын 200 мянган гишүүний нэр төрд сэв суулгасан С.Эрдэнэ, Х.Баттулга нартай холбоотой гэмт хэргийн мөрдлөг явуулж байгаа эсэхийг тодруулахаар хуулийн байгууллагад хандаж тодруулга мэдээлэл авлаа” гэсэн байна. Товчхондоо өнгөрсөн таван сараас хойш эрх баригчдын зүгээс хийж ирсэн “Х.Баттулгыг Хөгжлийн банкны зээл, төмөр замын хэргээр АТГ-т эрүүгийн хэрэг үүсгэн шалгаж байгаа” гэх мэдээлэл үүгээр няцаагдав.

Өөрөөр хэлбэл, эрх баригч нам Х.Баттулгатай “ял наймаалцсан байж болзошгүй” гэх хардлага бүрэн нотлогдов. Ердөө сарын гаруйхны өмнө Хууль зүй, дотоод хэргийн сайд Х.Нямбаатарын хэлсэн “Төмөр замыг гацааснаас болж үүссэн 80 их наядын хохирлыг Х.Баттулгаас нэхэмжилнэ” (Үүний дараа Цэцийн шийдвэр гарч, эрх баригч намын гишүүд Үндсэн хуулийн нэмэлт өөрчлөлтөөр хоёрхон жилийн өмнө халсан “давхар дээлээ” дахин нөмөрсөн билээ. Ард нь хэн байсан тухай энд ярих нь илүүц биз) гэх үгний үсэрсэн шүлс нь хатаж амжаагүй байхад өөрсдийн мэдэлд ажилладаг хуулийн байгууллагуудаар дамжуулан хэлсэн үгнээсээ буцлаа. Х.Баттулга МАН-тай ял наймаалцсан гэдэг нь үнэн болж таарав.

Тэгээд ч АН доторх тамганы маргаан эцэслээгүй байхад "Х.Баттулга гэмт хэрэг хийгээгүй, С.Эрдэнэ л гэмт хэрэгтэн" гэх мэдэгдлийг намын залуус хийж байгаа нь яавч "гэм зэмгүй" гишүүдийн гомдол санал биш байх. Харин Э.Бат-Үүлийн хэлсэнчлэн эрх баригч намаас АН-ын эсрэг явуулж буй "хагарлын менежмент" гэдэг нь ойлгомжтой. АН-ын тамганы хэрүүл АН-ын биш, МАН-ын эрх ашиг болж хувирсан нь үнэн юм байна.

Б.ЗАЯА