Баянгол дүүргийн хамгийн том нутаг дэвсгэртэй 20 дугаар хороог хоёр хувааж 20, 29 дүгээр хороо болгосон. Баянгол дүүргийн Засаг дарга Ө.Сумъяабаатар шинээр байгуулагдсан 29 дүгээр хороонд ажиллаж, хорооны Засаг дарга болон хэсгийн ахлагч, зохион байгуулагч нартай уулзан тулгамдаж байгаа асуудал, цаашид хийх ажлын талаар санал солилцлоо.
Шинээр байгуулагдсан 29 дүгээр хороо нь “Эрин”, “Хархорин”, “Өнөр” хороолол, 46/1, 47 дугаар байр гээд хүн ам ихээр төвлөрсөн хотхонууд ихтэй. Мөн “Хархорин”, “Шинэ Сандэй”, “Барс-2” зэрэг томоохон худалдааны төвүүд үйл ажиллагаа явуулдаг. Шинэ хороо нь 3500 гаруй өрхтэй бөгөөд хороо хуваагдахад хүн амын 70 орчим хувь нь тус хороонд харьяалагдах болсон.
Хорооны алба хаагчидтай уулзах үеэр зайлшгүй анхаарах шаардлагатай зарим саналуудыг хэллээ.
Үүнд:
- “Хархорин” захын гадна, төв зам дагуу худалдаа эрхэлж замбараагүй байдал үүсгэж байгаа иргэдийг захын удирдлагуудтай ярилцаж тусгай талбай гаргаж өгөх, гүүрний гарцыг амралтын өдрүүдэд нээлттэй байлгах;
- Гурвалжингийн гүүрний 2 талын явган замыг засаж сайжруулах, гүүрний доор байдаг том оврын техникүүдийг шилжүүлэх, нурсан даланг яаралтай засварлах;
- “Эрин” хорооллын урд байрлах даланг тохижуулах, гэрэлтүүлэг нэмэх шаардлагатай байгааг онцолоо.
Хорооны алба хаагчдаас гарсан дээрх саналуудыг хүлээн авч хариуцсан газар, хэлтэстэй нь хамтран шаардлагатай арга хэмжээг авч ажиллах болно.
Энэ бүсэд өмнө нь улсын сургууль, цэцэрлэг огт байгаагүй. Харин Нийслэлийн цэцэрлэгийн хүртээмжийг нэмэгдүүлэх ажлын хүрээнд 2022-2023 оны хичээлийн жилд хүн ам хамгийн ихээр оршин суудаг “Эрин” хороолол дотор 450 хүүхэд хүлээн авах хүчин чадалтай цэцэрлэгтэй болсон. Хотхон дотроо цэцэрлэгтэй болсноор авто замын түгжрэл тодорхой хэмжээнд буурсан гэдгийг хорооны алба хаагчид болон оршин суугчид хэлж байлаа.
Мөн тус хороонд ажиллах үеэрээ ӨЭМТ-ийн үйл ажиллагаатай танилцлаа.
Тус ӨЭМТ нь өнгөрсөн онд 20 дугаар хорооны ӨЭМТ-ийн салбар эмнэлэг болж шинээр байгуулагдсан. “Эрин”, “Хархорин” хорооллын оршин суугчдад эрүүл мэндийн анхан шатны тусламж үйлчилгээг цаг алдалгүй хүргэж байна.
Энэ үеэр эмч нар “Эрин”, “Хархорин” хороололд залуу гэр бүл олноор амьдардаг. Иймээс нярайн шарлагын аппарат нэн шаардлагатай байдаг гэдгийг онцолж байв.
