Дэлхийн удирдагчдын жил бүр болдог хамгийн том хурал болох НҮБ-ын Ерөнхий Ассамблейн 77 дугаар чуулган өчигдөр Нью Йорк хотноо эхэллээ. 

Энэхүү хурал нь тахлын улмаас хөл хорьсон гурван жилийн дараах анхны биечлэн хуралдаан юм. Гэхдээ удаан хугацаацы дараа биечлэн уулзаж байна гээд баярлахын оронд тэд гунигтай байх магадлалтай. Удирдагчид Украины дайн, хүнс, эрчим хүчний хямрал, Пакистан дахь үер, цаг уурын өөрчлөлт зэрэг дэлхий нийтийн санаа зовниж буй асуудлуудыг хөндөх болно.

Орос, АНУ, Европын орнуудын хооронд Украины асуудлаар, Хятад, АНУ-ын хооронд Тайвань болон худалдааны асуудлаар хурцадмал байдал өндөр байх төлөвтэй байна. ОХУ, БНХАУ-ын удирдагч нар оролцохгүй гэж мэдэгджээ.

НҮБ-ын Ерөнхий нарийн бичгийн дарга Антонио Гутерриш өнгөрсөн долоо хоногт "Ерөнхий ассамблей маш их аюулын үед хуралдаж байна" гэж мэдэгдсэн.

"Энэ бол үндсэндээ хуваагдсан дэлхийн анхны Ерөнхий Ассамблей. Өнгөрсөн зургаан сарын хугацаанд бараг л хүн бүр бие биенээ зодсон. Одоо бээлий нь тайлагдчихлаа" гэж Брюссельд төвтэй Олон улсын хямралын бүлгийн НҮБ-ын захирал Ричард Гован хэлжээ.

Өмнөд Солонгосын шинэ ерөнхийлөгч Юн Сук Ёол өнөөдөр Ерөнхий Ассамблейн чуулганд үг хэлэх төлөвтэй байна. Өнгөрсөн долоо хоногт тэрээр, Таймс сонины Сөүл дэх товчооны даргад хэлэхдээ, “Хойд Солонгос цөмийн аюул заналхийллээ эрчимжүүлж байгаа тул Өмнөд Солонгос Вашингтон, Токиотой аюулгүй байдлын хамтын ажиллагаагаа өргөжүүлэх нь зайлшгүй, бүр зайлшгүй шаардлагатай болсон” гэсэн юм.

Үүнээс гадна Энэтхэгийн удирдагч Нарендра Моди, Этиопын удирдагч Абий Ахмед нар мөн уулзалтыг алгасах болно. АНУ болон Европ цөмийн хэлэлцээрийн асуудлаар Иранд шахалт үзүүлэхийг оролдох нь гарцаагүй. Хөгжиж буй орнууд болон барууны орнууд хөгжлийн тусламжаас татгалзаж магадгүй юм.

Б.Бүжлхамаа