“Даншиг наадам-Хүрээ цам 2022” шашин соёлын наадмын өнөөдөр Хүй долоон худагт эхэллээ.
Тус арга хэмжээний үеэр лам нарын дунд ном хаялцах, мэтгэлцэх, балин тосон урлалын тэмцээн зохиогддог ба цам харайх, маань татах, Соёмбот туг залах, шашны сүлд дуулал эгшиглүүлэх, шашин соёлын үзэсгэлэн худалдаа зэрэг болно.
Даншиг наадамд хүчит 256 бөх барилдаж, их нас, даага болон жороо морьдын уралдаан болно. Мөн морьт харвааны үзүүлбэр зохион байгуулах юм байна.
Даншиг наадам нь анх 1639 онд Өндөр гэгээн Занабазарыг Монгол түмний шашны тэргүүн, анхдугаар Богд Жавзандамба хутагтын ширээнд өргөмжлөн залах үеэс эхлэлтэй, Монголын шашин соёлын томоохон арга хэмжээ юм.
