Баянзүрх дүүргийн 26-р хороонд шинээр 640 хүүхдийн сургууль барих ажлыг өнөөдөр эхлүүллээ.
Энэ талаар Хотын дарга Д.Сумъяабазар "Төлөвлөлтгүй маш олон барилга барьчихсан атлаа сургууль, цэцэрлэгээ шийдээгүй 26-р хороонд сургуулийн насны 11 мянган хүүхэд амьдардаг. Энэ хүүхдүүд тойргийн бус сургууль руу явах шаардлагатай болдог. Энэ нь замын түгжрэлд шууд нөлөөлж байгаа хүчин зүйл. Хоёр жилийн дараа энэ сургууль ашиглалтад орчихвол 640 хүүхдийг өөр бүс рүү зөөх шаардлагагүй болно гэсэн үг. Энэ тооны машин замын хөдөлгөөнд ачаалал нэмэхгүй болно.
Нийслэлээс газрын асуудлыг нь шийдэж, Улаанбаатар хотоос сонгогдсон гишүүд маань сургууль барих төсвийг улсын төсөвт суулгах үүргээ гүйцэтгэсэн. Гар нийлж, хамтдаа олон хүүхдийн эрүүл, аюулгүй орчинд амьдрах боломжийг нээж байгаа гишүүддээ талархаж байна" гэлээ.
Мөн тус дүүргийн 25-р хороонд Замын цагдаагийн 10 давхар оффис барих гэж байсан ажлыг болиулж, цэцэрлэг барихаар газрын асуудлыг шийдсэн байна. Тус газар 240 хүүхдийн хүчин чадалтай цэцэрлэгийн шавыг ирэх сард тавих аж.
