Төр нийгмийн зүтгэлтэн Г.Батхүү агсаны төрсөн өдөр өнөөдөр тохиож байна. Тэрээр 1960 оны Тавдугаар сарын 19-нд Өвөрхангай аймгийн Хужирт суманд төржээ. 

Түүний гэгээн дурсгалд зориулж Богд уулын Чандманий бага аманд үрээр ургуулсан 108 шинэс модыг гэр бүл, ажлын хамт олон, найз нөхөд болон Монголын Ардчилсан Залуучуудын холбооны гишүүд хамтран тарилаа. 

Түүний үеэл дүү П.Батчимэг "Улс орон даяар ид моджуулах хөдөлгөөн өрнөж байна. Бид ахынхаа гэгээн дурсгал зориулж гурав дахь жилдээ Богд уулын Чандманий бага аманд Байгаль орчны яам, Богд уулын захиргаанаас албан ёсны зөвшөөрөл аваад моджуулах төсөл хэрэгжүүлж байгаа. Өнгөрсөн хоёр жилийн хугацаанд тарьсан гацуур мод хөөрхөн ургасан байна. Энэ жил Архангай аймгийн Хотонтод үрээр арчилж ургуулж буй шинэс модны 108 суулгацыг тарьж байна. Ахын маань найз нөхөд, гэр бүл, Шунхлай, АПУ группын ажилчид, АЗХ-ны залуучууд өргөн олноороо оролцож мод тарилаа. Бид цаашид энэ уулын амыг бүхэлд ойжуулах том зорилго тавин ажиллаж байгаа. Бидний хамтдаа хийж буй энэ сайхан буяны ажил түм түмээр өргөжих болтугай" хэмээлээ. 

Энэхүү тарьж буй модны суулгацын онцлог нь гурваас дөрвөн жил үндсэн үрээр бойжуулж, тарих хугацаа болсон үед нь газарт суулгадаг бөгөөд ургах магадлал 99 хувь байдаг байна. 

Төр нийгмийн зүтгэлтэн Гаваагийн Батхүү нь инженер, эдийн засагч мэргэжилтэй. УИХ-ын гишүүн, УИХ-ын дэд дарга, Зам Тээвэр, Аялал жуулчлалын сайд,  АЗХ-г үүсгэн байгуулагч, Ардчилсан намын дэд даргын албыг хашиж байсан юм. Мөн тэрбээр Монголын хурдан морины соёлд үлэмж гавьяа байгуулсан, бизнесийн салбарт манлайлан цойлж, улс төрд олон түмний хайр хүндэтгэл, итгэлийг хүлээн ажиллаж байсан нэгэн юм.