Нүдэндээ инээмсэглэл тодруулсан энэ бяцхан охиныг А.Сормун гэдэг. Ес дүгээр ангийн сурагч. Африк гаралтай Америкийн иргэн хүний эрхийн төлөө тэмцэгч Маяа Анжэлоу-ийн намтар зохиолыг орчуулан хэвлүүлснээ хүүхэд халамжийн байгууллага болон бусад номын санд бэлэглэж, бодолдоо зурж, сэтгэлдээ мөрөөдсөнөө ажил хэрэг болгон яваа түүнтэй уулзаж цөөн хором ярилцлаа. Бидний ирээдүй гэрэлтэй, зорилготой, хийж бүтээх хүсэлтэй явааг харах сайхан байна.
-Номоо орчуулан гаргасанд баяр хүргэе. Эхлээд өөрийгөө танилцуулахгүй юу?
-Намайг Алтансүхийн Сормун гэдэг. 9-р ангид сурдаг.
-Яагаад Маяа Анжэлоугийн номыг сонгон орчуулсан юм бэ?
-Санамсаргүй сонголт байсан. Анх ээж маань уншаарай л гэж авч өгсөн юм. Арьс өнгө болон бусад тухайн хүний өөрөөс нь үл шалтгаалах, өөрчлөх боломжгүй зүйлүүдээр нь бусдыг ялгаварлан гадуурхах үзлийн талаар хичээл болон зарим номноос уншиж мэдсэн байсан л даа. Гэхдээ Маяа Анжэлоуг уншаад хүний эрхийн талаар, ялгагдаж болохгүй ялгаатай байдлын тухай илүү олон зүйлийг ойлгосон. Маяа Анжэлоу ямар ч үед хүсэл мөрөөдлийнхөө эзэн байж, хүнд хэцүүг даван туулж эцэст нь хүний эрх, тэгш эрхийн төлөө өөрийн дуу хоолойгоо хүргэж, олон зүйлийг өөрчилж чадсан эмэгтэй юм.
Үүнийг олон хүүхэд уншаасай, ялангуяа итгэл, найдвар, урам зориг хэрэгтэй байгаа тэр хүүхдүүдийг уншаасай гэж хүссэн. Тэгээд хэдхэн хувь хэвлээд өгөөч гэж хүссэн маань бүр ном болчихсон. Маш их баярлаж байгаа.
-Хэдий хэр хугацаа зарцуулав?
-4 сарын хугацаанд хичээлийнхээ хажуугаар орчуулж дууссан.
-Тусалсан хүн хэн байна?
-Маяа Анжэлоу-г сонгон авч өгсөн ээждээ их баярладаг.
-Ном хэвлүүлэх зардлаа хэрхэн олов?
-Гэр бүлийн хүрээнд л гарсан байх аа. /инээв/
-Хэдэн газарт номоо өгсөн бэ?
-Ид шидийн орон, Өнөр бүл, SOS national villages Mongolia хүүхэд хамгааллын байгууллагууд болон Улсын төв номын сан, Д.Нацагдоржийн номын сангуудад өгсөн.
-Цаашид юу хийхээр төлөвлөж байна вэ?
-Хийхээр төлөвлөсөн олон зүйл байгаа. Заавал ажил хэрэг болгоно оо гэж бодож байгаа. Бас Үндэсний эрх чөлөө, тусгаар тогтнолоо сэргээсний ойн хүрээнд зарласан "Би Монгол хүн" эссэ бичлэгийн уралдаанд тэргүүн байр эзэлсэн ХБНГУ-д байгаа үеэл эгчдээ баяр хүргэе. “Маяа Анжэлоу”-г олон хүүхэд уншаасай гэж бодож байна.
