НЗДТГ-ын Хэвлэл мэдээллийн албаны дарга Г.Хонгорзул өчигдөр Ерөнхийлөгчийн зөвлөх Ц.Пүрэвхүүгийн талаар Хотын даргыг буруутгаж буй нэгэн баримт сошиал хуудастаа дэлгэж, тухайн мэдээлэл нь олны дургуйцлыг хүргээд байгаа юм.
Тэрээр "Нэр бүхий өндөр албан тушаалтан ахайтан хэвлэл мэдээллийн байгууллагын сэтгүүлч сурвалжлагчдад ийм постер өөрөө хийж өгөөд түмэнд түгээ гээд байх юм ккк. Би үхэхээр чи үх гэдэг зарчим төрийн албанд үйлчилдэггүй байгаа шүү эрхэм өндөр сэнтийтээн. Бүгд нэг зорилгын төлөө, ард иргэдийнхээ эрүүл, аюулгүй амьдралын төлөө сонгогдсон болон томилогдсон албан тушаалтнууд үйлчилдэг. Бусдаар над руу дайраад байгаа болохоор хотын дарга руу дайр гэж сэтгүүлчид рүү ийм постер бэлдэж өгөөд байгаа нь инээд хүргээд байна. Нөгөөтэйгүүр нийслэл сайжруулсан түлшний түгээлт, түүхий нүүрс түлж байгаа эсэхэд хяналт тавих чиг үүрэг хүлээдэг ч бүх чадлаараа утааг бууруулах, агаарын бохирдлыг нэмэгдүүлж буй шалтгааныг олж тогтооход хичээн ажиллаж байна. Бусдаар хоорондоо толхилцлоо гээд хэн хохирох вэ? Ард иргэд мөн үү утааны гүнжхээн" хэмээн бичиж, Ерөнхийлөгчийн зөвлөх Ц.Пүрэвхүүгийн сэтгүүлчид рүү бичсэн мессеж бүхий зургийг дэлгэсэн юм.
Тэгвэл Ц.Пүрэвхүүтэй тайлбар хэлжээ. Тэрээр "Би энэ мэдээллийг өчигдөр орой харсан. Тийм зүйл болоогүй. Сая би Д.Сумъяабазартай ярилаа. Хэн тийм юм хийснийг хуулийн байгууллагаар шалгуулна. Эвлүүлэг хийсэн байна. Хуулийн байгууллага нь тогтоогоод өгөх байх" гэж тухайн мэдээллийг үгүйсгэжээ.
