Ковидын улмаас хоёр жил гаруй хугацаанд сургалтын үйл ажиллагаа доголдсон, мөн ерөнхий боловсролын сургуулийн сурагчдын сэтгэцийн болон нийгмийн харилцааны асуудлууд үүсээд байгаа билээ.

Эдгээр асуудлын суурь шалтгааныг арилгахын тулд Альфабүүк номын дэлгүүрийн зүгээс сургуулиудад “Өглөөний уншлага” хөтөлбөрт нэгдэх санаачлага гаргажээ.

Уг хөтөлбөр нь хичээл эхлэхээс өмнө 10 минутыг суралцагч болон багш нар уншлагад зарцуулах бөгөөд ном унших дадлыг төлөвшүүлэхээс гадна харилцаа хандлагын болон нийгмийн боловсрол хүмүүжлийг уг хөтөлбөрөөр дамжуулан хүргэх боломжтой гэж үзэж буй аж.

Монголд хувийн хэвшлийн зүгээс үндэсний хөтөлбөрийг амжилттай хэрэгжүүлсэн туршлага байгаа бөгөөд тухайлбал, иргэдийг хуримтлалтай болгох, хуримтлуулах зуршлыг нь дэмжих зорилгоор Монголын банк санхүүгийн салбарт “Үндэсний хуримтлалын хөтөлбөр”-ийг 2015 онд анхлан санаачилж хэрэгжүүлснээр орон даяар 200 мянган иргэн тус хөтөлбөрт нэгдэж хуримтлалтай болж чадсан байна.

Япон улсад 1988 онд ерөнхий боловсролын хоёр багшийн санаачлан эхлүүлсэн өглөө ангиараа ном унших хөтөлбөр нь улс орон даяар амжилттай хэрэгжсэн бөгөөд бүхий л сургуулиуд өглөөний уншлага хийх болсноос хойш нийгмийн суурь хүмүүжилд эерэг нөлөө үзүүлж, зөв боловсон хувь иргэнийг бий болгоход чухал нөлөөтэй хөтөлбөр болсныг бүхий л түвшинд үнэлсэн юм.

Уг хөтөлбөр нь сайн дурын үндсэн дээр явуулах бөгөөд нээлтэй, албадлагын бус, улстөрөөс ангид явуулах зарчмыг баримтлах, өглөөний уншлагад хамрагдаж буй суралцагч нэг бүрийн хувьд “өөрөө унших зүйлээ сонгох, бүгдээрээ хамт унших, уншсан зүйлээрээ асуугдахгүй байх” гэсэн зарчимтай гэнэ.

“Ном бол хайр” уриатайгаар үйл ажиллагаа явуулдаг Альфабүүк нь орон нутгийн болон алслагдсан аймаг, гэр хорооллын хүүхдүүдийг тэгш боломжийг бий болгох зорилготой “Мажикбокс” төсөл, “Өглөөний уншлага” хөтөлбөр зэрэг санаачлагаараа нийгэмд эерэг нөлөөлөл үзүүлэх зорилготой аж.