Хятадын барилгын магнат Evergrande Group-ийн санхүүгийн бэрхшээл, түүнийг уналтын ирмэг рүү түлхсэн Засгийн газрын бодлого нь эдийн засгийн чухал хөшүүрэг болох орон сууцны борлуулалтын зах зээлийг заналхийлж байна.

Олон жилийн турш орон сууц нь хятад гэр бүлийн хуримтлалын гол шалтгаан болж ирсэн. Хятадад өрхийн баялгийн бараг дөрөвний гурав нь үл хөдлөх хөрөнгөтэй холбоотой байдаг бөгөөд үл хөдлөх хөрөнгө нь тус улсын эдийн засгийн өсөлтийн дөрөвний нэгээс илүү хувийг хангадаг болсон гэж зарим тооцоогоор дүгнэжээ.

Одоо Эвергранд гэх мэт барилгын компаниуд барилгаа үргэлжлүүлэх боломжгүй байна. Тус улсын 1.6 сая орчим иргэд худалдаж авсан орон сууцаа хүлээсээр л байна. Бусад нь хэзээ ч баригдахгүй орон сууцанд мөнгөө өгөхөөс айж байгаа.

"Үнэндээ бидний үл хөдлөх хөрөнгийн зах зээл маш ноцтой буурч, үнэ, борлуулалт, барилгын идэвхжил унаж байгаа нь ойрын хоёр улиралд эдийн засгийн өсөлтийг удаашруулах магадлалтай байгааг бид харж байна" гэж эдийн засгийн бие даасан судалгааны компанийн захирал хэлэв.

Хятадын 100 томоохон үл хөдлөх хөрөнгийн компаниуд Есдүгээр сард борлуулалт өмнөх оны мөн үеийнхээс гуравны нэгээс илүү хувиар буурсан гэж мэдээлэх төлөвтэй байна.

Хэдийгээр Засгийн газар бараг дуугүй байсан ч зохицуулагчид энэ салбарыг дэмжих алхам хийж эхэлсэн байна. Төв банк дотоодын банкуудад илүү их мөнгө татах боломжийг олгох үүднээс яаралтай тусламжийн цэгүүдийг нээжээ. Орон нутгийн засаг захиргаа боломжит уналтыг удирдахад туслах ажлын хэсэг байгуулжээ.

Evergrande-ийн хамгийн сүүлийн үеийн мэдээ: Даваа гаригт тус компани хоёр долларын бондын хүүгийн ээлжит төлбөрөө алдсан байна. Мөн өнгөрсөн долоо хоногт Хонконг дахь хувьцаагаа арилжаалахаа зогсоож, ашигтай нэгж зарах боломжтой болсноо зарлажээ.

Б.Бүжлхамаа

www.nytimes.com