Засгийн газрын тохируулагч агентлаг болох Харилцаа холбоо, мэдээллийн технологийн газраас ICT экспог "Digital nation" уриан дор Есдүгээр сарын 17-19-нд зохион байгуулж байна.

Үндэсний соёл амралтын хүрээлэнд болж буй тус арга хэмжээний нээлт өчигдөр хөл хөдөлгөөн ихтэй болж, цар тахлын үед иргэдийг олноор нь цуглуулсан гэх шүүмжлэлийг дагуулж, төрийн болон хувийн хэвшлийн ялгааг гаргаж байна.

Тэгвэл тус арга хэмжээг зохион байгуулах зөвшөөрлийг НОК-оос олгоогүй юм байна. 

НОК-оос энэ сарын 1-ний өдөр Харилцаа холбоо мэдээллийн технологийн газарт хүргүүлсэн албан бичигт "Цахим үндэстэн-Digital Nation 21" арга хэмжээ зохион байгуулах зөвшөөрөл олгох боломжгүй гэж мэдэгдсэн байна.

Гэвч тус арга хэмжээг Харилцаа холбоо, мэдээллийн технологийн газраас зохион байгуулж, маш олон хүний бөөгнөрөл үүсгэжээ.

НОК-оос сургууль, цэцэрлэгийн сургалтыг эхлүүлсэнтэй холбоотойгоор халдварын тархалт нэмэгдэх өндөр эрсдэлтэй хэмээн үзэж төрийн болон ААН, иргэний аливаа арга хэмжээ зохион байгуулах хүсэлтийг хүлээн авахгүй байгаагаа албан бичгээр мэдэгдсэн байна. 

Манай улс гамшгаас хамгаалах өндөржүүлсэн бэлэн байдалд ажиллаж байна. Өчигдөр гэхэд ЭМЯ-наас үйлдвэрлэл, үйлчилгээ тэр дундаа баар, лоунж, ресторануудыг 22:00 цагт хаах саналаа УОК-т хүргүүлээд байгаа билээ.