Ямартай ч АН-ын дотоодод өрнөсөн тамганы дажин хуулийн хувьд өндөрлөж, шүүхийн шийдвэрээр намын тамга М.Тулгатад үлдлээ. Өчигдөр хуралдсан Нийслэлийн Захиргааны хэргийн давж заалдах шатны шүүхийн шийдвэрээр С.Эрдэнэд олгосон АН-ын тамгыг хууль ёсны хэвээр үлдэв.

Нөгөө талаас “Шүүхийн маргаан дуусаагүй, маргааныг анхан шат руу буцааснаас өөр зүйлгүй” гэж тайлбарлаж байгаа боловч анхан шатны шүүх дээр ч гэсэн хэлэлцэх асуудал үлдсэнгүй. Учир нь Ц.Тувааны зүгээс С.Эрдэнэд олгосон тамгыг хүчингүй болгуулахаар шүүхдэх үед Ц.Тувааны нэр УДШ-ийн цахим бүртгэлд байсан. Энэ үндэслэлээр тэр АН-ын тамгыг өөрийн болгохыг зорьсон бол өнөөдөр Ц.Тувааны нэр цахим бүртгэлд байхгүй. Харин хууль ёсны тамга нь М.Тулгатад байгаа гэдэг утгаараа Дээд шүүх АН-ын даргаар М.Тулгатын нэрийг цахим бүртгэлд оруулах үүрэгтэй. Товчхондоо, 2024 оны УИХ, орон нутгийн сонгуулийг дуустал М.Тулгат АН-ын тамгыг атгахаар болов.

Үүгээр АН-ын дотоодод өрнөсөн тамга тэмдэгний маргаан хуулийн хувьд дуусч, С.Эрдэнэ албан ёсны нэр дэвшигч хэвээр үлдлээ. Харин нөгөө тал үлдсэн хугацаанд яаж ажиллах вэ гэдгээс ирэх сонгуулийн дүн, С.Эрдэнийн ялалт, ялагдал хамаарна.

Шүүхийн шийдвэр гарсны дараа өчигдөр үдээс хойш АН-ын ерөнхий нарийн бичгийн дарга Ч.Өнөрбаяр мэдээлэл хийхдээ, намынхаа үе үеийн дарга нар, УИХ-д сонгогдсон гишүүд, орон нутгийн намуудад хандаж, удахгүй болох Ерөнхийлөгчийн сонгууль, 2024 оны УИХ-ын сонгуулийн ялалтын төлөө хамтарч, нэгдэж ажиллахыг уриалав. Тус намын хувьд дотоодын “дайнаа” дуусгаад гадагшаа өрсөлдөх өрсөлдөөндөө хүчээ хуримтлуулах, нэгдэж нягтрах цаг ирэв. Яг 2017 оны Ерөнхийлөгчийн сонгууль шиг.

2017 оны сонгуулийн өмнө Х.Баттулга АН-аас Ерөнхийлөгчид Н.Алтанхуяг, Р.Амаржаргал нартай нам дотроо өрсөлдөхөд хэн ч Х.Баттулгыг нөгөө хоёроо хол орхиод гараад ирнэ чинээ санаагүй. Гэвч нэгэнт намын олонхи гишүүд нь Х.Баттулгыг дэмжсэн учраас бусад өрсөлдөгчид нь ч гэсэн Х.Баттулгынхаа ард гарч зогсоод нэгэн дуугаар нэр дэвшигчээ дэмжсэн. Улс төрийн соёлтой, шударга өрсөлдөөн гэж үүнийг хэлдэг. Х.Баттулгыг 2017 онд Ерөнхийлөгч болгосон хүн ч гэсэн С.Эрдэнэ.

Тиймээс өнөөдөр ч гэсэн Х.Баттулга энэ намд эргэж ирэх нүүртэй үлдье гэвэл С.Эрдэнийнхээ эсрэг хэвлэлийн пиар, соошл дайнаа зогсоогоод, Н.Алтанхуяг, О.Цогтгэрэл нарынхаа жолоог татах ёстой. Үгүй бол нэгмөсөн шинэ нам байгуулаад, МАН-тай нийлээд С.Эрдэнийнхээ эсрэг явах хоёр л сонголт байна.

Б.ЗАЯА