МАН, МАХН хоёр нэгдлээ. Өнгөрөгч бямба, ням гаригт МАХН-ын төв байранд МАХН-ын Их, Бага хурлууд хуралдаж, МАХН-ыг татаж буулгаж, МАН-д нэгтгэх шийдвэрээ гаргав. Арав гаруй жилийн өмнө МАН-ын дарга У.Хүрэлсүхийг "намын нэр өөрчиллөө" хэмээн алахаас наагуур юм болж, намаасаа гарсан нөхөд өнөөдөр нүдэндээ нулимстай эргэж ирэв. Үүгээр МАХН-ын дарга Н.Энхбаярын бүтэн 11 жилийн нөр их зүтгэл дуусч, улс төрийн рингээс нэгмөсөн буулаа. Одоохондоо У.Хүрэлсүх хоёр намыг нэгтгэн зангидахаар болсон ч ганцхан сарын дараа У.Хүрэлсүх сонгуульд ялах, ялагдахаас үл хамаарч МАН-ын даргын тамгыг Ерөнхий сайд Л.Оюун-Эрдэнэд хүлээлгэж өгнө. Тэр цагт МАН дотор жинхэнэ "цусгүй тулаан" өрнөх биз...
Гэвч хоёр нам нэгдэх энэ зүй тогтлыг хамгийн түрүүнд олж харсан нэг хүнийг мартаж болохгүй. Тэр бол Баянгол дүүргийн ИТХ-ын гишүүн Э.Магнайбаяр.
2020 оны орон нутгийн сонгуульд МАХН, АН хоёр МАН-ын эсрэг эвсэл байгуулж оролцсон ч сонгуулийн дүн гарсны дараа Э.Магнайбаяр МАН-д урваснаар тус намыг олонхийн суудалд хүргэж, Баянголд МАН засаглах болсон билээ. Үүнээсээ болж урвагч шарвагчаараа дуудуулж, өндгөөр шидүүлж, АТГ-т шалгуулж явахдаа /МАХН-ын дарга Н.Энхбаяр түүнийг МАН-д орсон нь авилга, албан тушаалтай холбоотой хэмээн шалгуулсан/ түүний хэлсэн "Миний энэ сонголт МАХН, МАН хоёрын нэгдлийн эхлэл болох болтугай" гэдэг үг өнөөдөр биеллээ олов. Үүгээрээ Э.Магнайбаяр гэдэг залуу 2020 оны хамгийн, хамгийн "алсын хараатай" хүнээр тодорч байна.
Сонирхолтой нь Э.Магнайбаярыг МАХН-аас гарч МАН-д ороход АН-ын гишүүд өндгөөр шидэж, алганы амт хүртэл үзүүлсэн бол С.Ганбаатарыг МАХН-аас гарч АН-д элсэхэд АН-ын зарим дарга нар хадаг сүүтэй угтаж, Ерөнхийлөгчийн сонгуульд нэрийг нь дэвшүүлсэн байдаг юм.
