Хууль зүйн сайд Х.Нямбаатар өнөөдөр "Мэдээллийн урсгал" нэвтрүүлгийн зочноор оролцож, дөрвөн сэтгүүлчийн асуултад хариулав. Энэ ярилцлагын үеэр Хуульзүйн сайдтан С.Зоригийн хэргийн яллагдагч нартай холбоотой нэгэн байж боломжгүй мэдэгдлийг хийлээ. Тэр "Хэргийн газрын үзлэгээр хураагдсан 33-34 биологийн дээжийг 2014, 2015 онд АНУ руу явуулж ДНХ-ийн шинжилгээ хийлгэсэн. Шинжилгээгээр энэ гурван хүний ДНХ илрээгүй" гэж хэлэв. Харамсалтай нь энэ тийм биш гэдгийг олон хүн мэддэг болсон.
Тодруулбал, уг хэрэгт хяналт тавьж ажилласан УЕП-ийн орлогч Г.Эрдэнэбат хэргийг шүүхээр шийдвэрлэсний дараа "Цензургүй яриа" нэвтрүүлэгт ярилцлага өгөхдөө "Хэргийн газраас олдсон ул мөр буюу нотлох баримтуудыг шинжилгээнд явуулсан боловч тэндээс хэн нэг хүний ДНХ илрүүлээгүй. Хэдэн зуу, мянган хүний ДНХ гарах боломжтой учраас шалгах боломжгүй гэдэг хариу өгсөн" гэдгийг тов тодорхой хэлсэн. Өөрөөр хэлбэл, 18-19 жил хураагдсан нотлох баримтуудаа хадгалж, хамгаалаагүй учраас нотлох баримтын шаардлага хангахааргүй болсон байсан гэсэн үг. Тиймээс хэргийг нотлохдоо хэргийн газраас олдсон нотлох баримтаар биш, өөр бусад нотлох баримтуудаар нотолсон.
Харин Х.Нямбаатар сайдын хувьд эхнээсээ л "эрүүдэн шүүсэн" гэх хэргээр шалтаглан энэ хэргийг хэрэгсэхгүй болгохын төлөө явж байгаа учраас "Хэрэгт яллагдсан гурван хүний ДНХ хэргийн газраас илрээгүй" гэж хэлэх нь ашигтай байсан бололтой.
