Тавдугаар сарын 4-ны байдлаар Улсын хэмжээнд 111,076 хүн хамрагдсанаас Улаанбаатар хотод 43,099 хүн, орон нутагт 67,977 хүн вакцинжуулалтад хамрагджээ.

Эхний тунд 18-аас дээш насны иргэдийн 54,6 хувь нь, хоёрдугаар тунд 25,8 хувь нь хамрагдсан байна.

Өчигдөр Эрүүл мэндийн яамны мэдээллийн үеэр ЭМЯ-ны Эмнэлгийн тусламжын бодлого хэрэгжилтийн газрын дарга Б.Буянтогтох "Сүүлд Спутник-V вакцины хувьд 40 мянган тунг оруулж ирсэн. Үүнээс улсынх 20 мянган тун байгаа. Энэ вакциныг иргэдэд хийж эхлээгүй байна. Гол асуудал нь ковидын вакцинжуулалт нь заавал давхар тун авдагт байгаа юм. Харин Спутник-V вакцины хувьд давтан тунгаа хэзээ бид авах боломжтой болно тэр үедээ энэ вакцинаа хэрэглээнд оруулна. ОХУ-аас хэзээ нийлүүлхийг тодорхой болсны дараа гэсэн үг" хэмээн мэдээлсэн. 

Тэгвэл Улсын Онцгой Комиссын хэвлэлийн төлөөлөгч Ц.Ганзориг "Спутник ойрхон ирэхгүй нь ээ. Үйлдвэрлэлийн хүчин чадалтай холбоотой. Цэгүүд дараалал бага тул та бүхэн вакциндаа яарна уу. Тавдугаар сарын 8-наас хөл хориог шатлалтай суллахдаа зарим үйлчилгээнүүдийн ажиллагсад болон үйлчлүүлэгчид давтан тундаа хамрагдаад 14 хоносон хүмүүст нээлттэй байхаар журамлагдаж буй тул та вакциндаа хамрагдана уу" гэсэн юм. 

Иргэдийн эрүүл мэнд, эдийн засаг, нийтийн эрх ашгийн үүднээс ийнхүү журамлаж байгаа гэдгийг тэрээр онцолсон байна.

Мөн УОК-оос гаргаж буй хөл хорионы дараа дагаж мөрдөх журамд халдварын тоо өсөх эрсдэлтэй тул зах, худалдааны төвүүдийг нээхгүй байх саналыг гаргасан байна. Саналыг Засгийн газрын өнөөдрийн хуралдаанаар хэлэлцэн эцсийн шийдвэрийг гаргана.