Ардчилсан намын Ерөнхий нарийн бичгийн дарга Ч.Өнөрбаяр тус намаас Ерөнхийлөгчийн сонгуульд нэр дэвшигч С.Эрдэнийг төлөөлж, нэр дэвшигчийн материалыг нь Сонгуулийн Ерөнхий Хороонд хүлээлгэж өглөө. 

М.Тулгат тэргүүтэй АН-ын цахим сунгаагаар С.Эрдэнийг нэр дэвшүүлэхийг гишүүдийн олонх үзсэн тул өчигдөр нэр дэвшигчээр батламжилсан билээ. Улмаар мөрийн хөтөлбөрийг нь Үндэсний аудитын газарт хүргүүлсэн байна.

АН-ын Ерөнхий нарийн бичгийн дарга Ч.Өнөрбаяр "Үндэсний аудитын газар бид мөрийн хөтөлбөрөө өчигдөр хүргүүлсэн. Үүнд холбогдох шаардлагатай материал бүгд бий. Улсын бүртгэлийн гэрчилгээний бичилт, Дээд шүүхийн шийдвэр зэргийг мөрийн хөтөлбөртөө хавсаргасан. С.Эрдэнэ гуайн хувь хүнтэй холбоотой асуудлыг энд яриагүй.

УИХ-д суудалтай улс төрийн нам Ерөнхийлөгчид нэр дэвшүүлэх эрхтэй байдаг. УИХ-ын 2020 оны ээлжит сонгуулиар Ардчилсан нам парламентад суудалтай болсон юм. Намын даргын асуудалд маргаан үүссэн болохоос биш АН байхгүй болсон юм биш. Шинэ даргыг Дээд шүүх бүртгэх хүртэл хуучин дарга нь хүчинтэй хэвээр байна. АН-ын дүрмээр нэр дэвших эрх болзол хангасан хүнд нэр дэвших эрх нь бий. Сонгуулийн Ерөнхий хороо бүртгэхгүй байх асуудал гарахгүй гэдэгт итгэлтэй байна" гэлээ.

Хоёр удирдлагатай болоод буй тус намаас хоёр талд Ерөнхийлөгчид нэр дэвшигчийг тодруулаад байгаа. Тодруулбал, О.Цогтгэрэл тэргүүтэй АН-аас Н.Алтанхуяг, М.Тулгат тэргүүтэй АН-аас С.Эрдэнэ нэр дэвшихээр болсон. Ерөнхийлөгчийн сонгуулийн тухай хуульд заасны дагуу дээрх хоёр нэр дэвшигч материалаа Үндэсний аудитын газар өчигдөр хүргүүлсэн юм.