Ерөнхий сайд У.Хүрэлсүх “Өдрийн сонин”-ы өчигдрийн дугаарт ярилцлага өгчээ. Ерөнхий сайдын албанаас бууснаас хойш анх удаа өгсөн ярилцлага /өмнө Ерөнхий сайд байхдаа ч гэсэн их олон ярилцлага өгөөд байсангүй/ болохоор олон хүний анхаарлыг татсан байх.

Гэвч харамсалтай нь уг ярилцлагад өлгөөд авчихаар ганц олигтой үг, үзэл санаа олдсонгүй. Нөгөө л тойрч зугтдаг, бурууг бусад руу заадаг хэвээрээ. Ганц хэлээд байгаа зүйл нь “Би ухарч няцахгүй, эхэлсэн ажлаа дуусгана” л гэсэн байна. Ямар ажил эхлүүлчихээд яаж дуусгах гээд байгааг бүү мэд. /Цахилгаан, дулааны үнийг тэглэсэн тухайд бол хөөрхий, У.Хүрэлсүхтэй сүхгүй төрийн өмчит хэдэн компаниуд нь төлөөд дуусгана. Ирэх долдугаар сар хүртэл. Тэрнээс наана Ерөнхийлөгчийн сонгууль ч дуусна/

Үлдсэн нь дандаа эдүгээгийн Ерөнхийлөгч болон сөрөг хүчин лүүгээ бухсан, булзааруулсан зүйлүүд байх аж. Ерөнхий сайдын албан тушаалаас буусан нь Х.Баттулгаас болсон. Тэр хүн нийтийг хамарсан эмх замбараагүй байдлыг өдөөхөөр санаархаж байгаа тагнуул, цагдаагийн мэдээлэл байсан учраас улс орноо үймээн самуунд автуулахгүйн тул өөрийн хүсэлтээр ажлаа өгсөн гэнэ. Хэрэв тийм бол тэр нь маш хүнд ялтай эрүүгийн гэмт хэрэг, түүнийх нь төлөө одоогийн Ерөнхийлөгчид хуулийн хариуцлага тооцох, импичмэнт хийх тухай ярих ёстой. Атал мань хүн “УИХ-ын гишүүнийхээ хувиар асуудлыг хуулийн дагуу тавина” гэснээс хойш гурван сар гаруйн хугацаа өнгөрлөө. Түүний хэлснээр У.Хүрэлсүх гэдэг хүн Х.Баттулга гэдэг хүний тавьсан “урхинд оролгүй” амжилттай зугтсан нь сайн ч ард иргэд үнэнийг мэдэж чадсангүй. 

Ерөнхийдөө эрх барьж байгаа намын дарга, Ерөнхий сайд байсан, тэр тусмаа Монгол Улсын Ерөнхийлөгчид нэр дэвшиж өрсөлдөх гэж байгаа хүний хувьд дэндүү “жол” ярилцлага өгчээ. Ямар ч бэлтгэлгүй. Ямар зорилготой ярилцлага өгсөн нь ч ойлгомжгүй. Ядаж УИХ-ын нэг гишүүний хэмжээнд бодлого, санал ярьсан зүйл уг ярилцлагаас олдсонгүй. Харин түүний бэлтгэсэн “тролл”-ууд бол нийгмийн сүлжээнд жинхэнэ “балай авч” байна. Хурандааг аль хэдийн ялуулчихаад байгаа. Үүнээс илүү зүйл өөрт нь хэрэггүй бололтой.

“Танд итгэж танай намд саналаа өгсөн иргэд таныг суудлаа орхиод  зугтсанд гомдолтой байна” гэхээр “Би үүнийг гомдол гэхээсээ илүү ажил хий, асуудал шийд, хариуцлага тооц, эхэлснээ дуусга гэсэн зэмлэл гэж хүлээн авч байгаа. Би ажлаа үргэлжлүүлнэ” гэж зүтгэх. Тийм зоргоороо. Гомдоосон бол ядаж “Уучлаарай” гэдэг биз дээ. Тэгсэн манай хурандаа “Мань чинь илүү томорно оо, хараарай, хүлээж байгаарай” л гэж байна. Тийм нэг ёс зүйгүй, ямар ч мэдрэмгүй, булчингаараа ярьдаг хэвээрээ...  

Б.ЗАЯА