Зэвсэгт хүчний жанжин штабаас сүүлийн үед Монгол улсад өрнөж байгаа улстөрийн нөхцөл байдалтай холбогдуулан ЗХ-ний байгууллагын байр суурийг хүргэлээ. 

ЗХЖШ-ын дарга, хошууч генерал Д.Ганзориг "Зэвсэгт хүчний нийт бие бүрэлдэхүүн нь эх орноо харийн түрэмгийлэгчдээс хамгаалах, аж үйлдвэрлэл, улс орны аж ахуйг хөгжүүлэх зэрэг цаг ямагт манлайлсаар ирсэн. Орчин цагийн Зэвсэгт хүчин үүсээд 100 жилийн үдэж, хоёр дахь зуунаа эхлүүлээд явж байна.

Зэвсэгт хүчин нь улс төрөөс ангид байж, улс орны аюулгүй байдлыг хангах хуулийн зохицуулалттай. Зэвсэгт хүчнийг улс төртэй холбож, олон нийтэд сөрөг мэдээлэл цацах нь хууль зөрчиж буй үйлдэл бөгөөд зэвсэгт хүчинд итгэх иргэд олон нийтийн итгэлийг бууруулж, цаашлаад үндэсний аюулгүй байдлыг алдагдуулах, гадны улсын өгөөш болгох нөхцөл байдлыг бүрдүүлдэг.

Зэвсэгт хүчнээ улс төржүүлэх, улс төрийн үйл ажиллагаандаа татан оруулснаар иргэний дайнд хүргэж, улс орноо мөхөөх хүртэлх түүх олон бий. Энэ гашуун түүх манай Монголд бүү тохиолдоосой гэдгийг ЗХЖШ-ын даргын хувьд хэлье.

Ард түмнээс сонгогдсон УИХ-ын гишүүдийг бид хүндэтгэдэг. Гэхдээ зэвсэгт хүчинтэй холбоотой нээлттэй хэлэлцүүлэг хийсэн нь төрийн болон албаны нууцыг алдагдуулах нөхцөл үүссэн гэж үзэж байгаа" гэсэн юм.

Мөн тэрээр "Бид сүүлийн үед өрнөсөн цэргийн албатай холбоотой зөрчлийн үндэс шалтгааныг олж, таслан зогсоохын тулд онцгой анхаарч ажиллаж байна" хэмээн онцлон хэлсэн юм.

Түүнчлэн, өчигдөр буюу энэ сарын 19-ний өдөр Ерөнхийлөгч ЗХЖШ дээр зочилж, гурван чиглэлээр үүрэг өгсөн талаар мэдээллээ. 

Үүнд: 

• Цэргийн албыг сайжруулах асуудлаар гаргасан ажлын хэсгийн үйл ажиллагаатай танилцсан, 

• Зэвсэгт хүчний 100 жилийн ойг тэмдэглэн өнгөрүүлэхийг хойшлуулж, хэзээ хаана ямар арга хэмжээ зохион байгуулах боломжтой талаар хэлэлцсэн, 

• Цэргийн нэгдсэн холбоотой хамааралтай үйл ажиллагааны талаар лавлаж асуусан гэлээ. 

Мөн тэрээр "Өчигдөр орой Монгол Ардын Намаас мэдээлэл хийхдээ, Ерөнхийлөгчийн ЗХЖШ дээр ирсэн асуудлыг улс төрийн өнгө аястай болгон ярьж байгааг ЗХЖШ-аас албан ёсоор няцааж байна" гэлээ.