ТЕГ-ын дарга асан, генерал Б.Хурцын эхнэр, "Сарнайх" салоны эзэн Ү.Сарнайн ярилцлага "Өдрийн сонин"-д нийтлэгджээ. Ярилцлага бүхэлдээ сонирхолтойгоос гадна зарим газраа бас хоржоонтой. 

Тухайлбал, Хууль зүй, дотоод хэргийн сайд асан Ц.Нямдорж саяхан сэтгүүлчидтэй уулзахдаа "Б.Хурц бол Барилгын техникум төгссөн, боловсролгүй хүн. Орост бүх юм задгайрч байх үед тагнуулын хоёр жилийн курс төгссөн диплом худалдаж авсан" хэмээн ярьсан билээ. Энэ тухай Ц.Нямдорж сайд анх удаагаа ч ярьж байгаа биш аж. Өмнө нь ч гэсэн ингэж ярьдаг, Москва руу Б.Хурцын сурч байсан сургууль руу нь албан тоот явуулан лавлагаа шаардаж бай. Москвагаас "Манай сургуульд сурч байсан нь үнэн" гэдэг хариу хүлээж авсан ч мэдээж энэ тухайгаа огт дурсдаггүй. Учир нь түүний хувьд баримт чухал биш. Хэрвээ тэр "худалдаж авсан" гэж хэлсэн л бол худалдаж авсан гэсэн үг.  

Энэ тухай ярианыхаа завсарт "Сарнайх" салоны эзэн Ү.Сарнай "Ц.Нямдоржийг таньж мэддэг хүмүүс нь гайхдаг л юм билээ. Ленинградын их сургууль төгссөн гэдэг хэрнээ оросоор огт ярьдаггүй" гэжээ.

Соц үед Зөвлөлтөд төгссөн манай сэхээтнүүд бүгд л яриандаа ямар нэг байдлаар орос үг хавчуулж ярьдаг. Моодорхдог ч байсан байх, мэргэжлийн зайлшгүй шаардлага ч бас байдаг л байх.

Харин Ц.Нямдорж сайдын хувьд долоон удаа УИХ-д сонгогдож, таван удаа Хууль зүйн сайдаар ажиллахдаа ганцхан тохиолдолд оросоор ярьсан тохиолдол нь "Би рецедивүүдийг дарсан" /рецедивист буюу давтан гэмт хэрэгтэн, гэмт хэрэг үйлдэж болзошгүй этгээд гэсэн утгатай/ гэдэг үг байдаг юм. Дөчин жилийн өмнө /1981 онд/ их сургууль төгссөнөөс хойш нэг ч удаа тархиндаа гэгээ оруулаагүй, дан ганц хар практикаар явчихсан хүнд академик түвшний орос хэл төдийлөн хэрэг болдоггүй байх л даа.

Б.Аялаг